英超煞科戰，摩連奴擺明留力盡出副選，不過都以2比0完勝水晶宮。賽後記者會，摩帥特登晨咁早現身，當時在場得3個記者，佢由門口行到張枱坐低，女公關問大家有冇問題要問，到佢只係講咗「Good」同「Bye, guys！」繼而起身走人，全程只得11秒，可能係史上最短記者會。即使對住曼聯官方電視台，摩帥都係冇面俾，叫記者唔好問咁多嘢，因為要準備歐霸盃決賽。老實講，紅魔可唔可以拎到歐聯入場券都睇呢鋪，呢場決賽真係不容有失。對於決賽對手阿積士，摩帥話阿積士喺今屆歐聯分組賽出局，但轉戰歐霸盃又殺入決賽，所以唔同意現時容許球隊同時踢兩項歐洲賽嘅賽制，聽落又有啲道理喎。