辛祖、福仔、科頓
掛住三獅國腳呢個牌頭，個價近年越炒越貴，但往往失敗居多。新近「傑作」係年僅26歲、過去5年賺緊廿多萬英鎊周薪嘅當打翼鋒查頓辛祖，當年用咗紅魔7千多萬英鎊從多蒙特買返嚟；結果之後同曼聯前帥「坦克」徹底鬧翻被逐出一隊，對上3季連借給多蒙特、車仔同維拉，全部唔肯買斷佢份約，終於今個夏天回復自由身，暫時喺英國第10級聯賽嘅Flixton FC跟操等落班。佢下站應該好難留得喺英超，仲想發圍可以大減人工喺西歐球會落班攞返啲比賽信心，或者以佢嘅名氣，西亞油元都仲可以大賺多一轉。
三獅明日之星打落凡間，多不勝數，尤其打翼鋒跟唔上英超長期高速運行嘅速率，踏入25歲後就會慢慢現形退步。辛祖嘅曼聯師兄拉舒福特人工更高，懶於防守不合潮流前路茫茫，下一位只怕係曼城嘅科頓。反而以為不合時宜嘅三獅柱躉中鋒，喺任何年代都有唔錯嘅出路，以前華dee、現在嘅卡尼，更勁當然係35歲仲啱啱可以轉會車仔嘅韋帝。車仔十單刁有九單可能係買錯買貴，呢次或者例外。