英超新叢林法則

英超34屆歷史，單係曼聯同曼城已佔當中21屆冠軍，兩大曼市球隊分別傲視英超歷史嘅上下半場，要佢吔同年同月同時期失威極唔尋常。上屆只有試過一次喺同一周聯賽輸波，今屆比去季早一個月出現呢個場面，曼城俾維拉殺敗兼破長勝身；但更大危機可能隨時俾賽會宣判財務違規，下季降班。曼聯主場吞般茅三蛋愈踢愈沉，暫比包尾嗰隊只多2分，「兩曼」一齊降班嘅機率，從未試過呢刻咁高。

英超叢林法則出現大震盪，弱肉或不再強食。曼市雙雄「出事」，令其他下游球隊護級機會提升，佢哋領隊嘅存活期大增。傳統Big Six車路士同熱刺換來更多時間執靚隊波，前屆包辦冠、亞軍嘅利物浦同阿仙奴，可能係未來長期稱霸英超嘅新王者，白禮頓同維拉係今屆爭歐聯席位嘅強力挑戰者。藍月3屆英超神射手艾寧夏蘭特，季後有冇機會跳船去其他歐洲班霸？紅魔上屆英超足球先生般奴費南迪斯，會唔會造反失敗，季尾決意去西亞掘金？英超將出現嘅新秩序，比任何時期都更矚目。