究竟做MIRO有冇著數

MIRROR巡唱咗幾個月，為解粉絲思念之苦，官方fan club預告兩個活動，包括下個月12子各自搞見面會，年底又會舉行齊腳大型見面會慶祝出道6周年。明明照顧晒「唯粉」同「團粉」，嘗試滿足兩類需求，結果都係惹來批評，話搞12場見面會冇「團魂」，又話睇晒12個要好多錢。

話時話，上年喺迪士尼搞嘅周年活動咁成功，翻炒條橋咪算，做咩咁新穎要12子各自搞見面會？據聞背後係用心良苦。你知啦，部分鏡仔嘅粉絲，特別瘋狂啲又手快啲，好多活動九成以上嘅飛，其實都係由幾個鏡仔嘅粉絲佔據，令其他鏡仔嘅粉絲失望。今次正正就係想令唔同鏡仔粉絲，都有更多機會見到自己偶像，但費盡心思似乎冇咩掌聲，反被人話官方fan club帶頭分化。

MIRO成立兩年，齊腳活動就話自己偶像出得太少，solo活動又話睇唔晒12子，點都有人鬧似乎都係官方活動逃不過嘅宿命，做咩都話係呃錢。到底$440會費抵唔抵，我嘗試歸納一下，過去一年有咩著數。

1) 迎新禮盒紀念盒及各大節日套裝，堆相同紀念品都唔hea，估計成本都值半年會費。

2) 獨家活動，例如上年迪士尼周年活動，同埋喺啟德郵輪碼頭舉行3場見面會，前者成萬fans入場玩足全日，後者都有幾千，唔敢話人人有份，但係都應該滿足好多人需求；仲有人人有份嘅網上見面會see you zoom，雖然係隔住個mon，但都真係fans club限定活動。

3) 大大小小嘅演唱會同活動優先訂飛同折扣等等，雖然都有限名額，不過我覺得算幾有誠意，自己公司搞嘅就特設MIRO場，同人合作嘅活動都爭取優先訂位，唔少仲早過贊助商㗎。

講到呢度，應該好多人想問我︰你究竟收咗幾多錢寫呢篇嘢？其實真係冇，我亦唔會總結話＄440會費好抵，因為我知道，抽到飛入場咪抵囉，一次都抽唔中就廿蚊一年都唔抵。又咁講，古今中外有冇fan club，係入會包百分百參與？我想加入。