飲水「斯」源
2020-06-30

熱天來了,要多喝水是常識吧?講起飲水,不得不提斯德哥爾摩嘅水。

斯德哥爾摩係由大小不同嘅群島組成,四周都被水環繞。唔止個景靚啊,呢度嘅水仲好好飲𠻹。仲記得第一次飲水喉水時帶嚟嘅震撼。

打開水龍頭就可以直接飲用,有少少甘甜,而且就算喺大熱天時都非常冰涼。呢樣亦係我最喜歡斯德哥爾摩嘅其中一點。就算係土生土長嘅斯德哥爾摩人,普遍都對本地嘅水質感到非常自豪。

本地人甚少會買樽裝水飲,除非係買汽泡水或者有味嘅汽泡水。一嚟係因為環保,二嚟因為水喉水嘅水質其實仲好過大部分嘅樽裝水,所以根本冇咁嘅需要。一般餐廳都會免費提供清水,喺夏天仲會見到唔少店家將水兜放喺路邊,等經過嘅小動物可以飲用。有時會喺廁所洗手盆見到紙杯,不過唔係俾人驗尿,而係用嚟飲水㗎。

瑞典人唔止對自家水質自豪,仲非常關注世界各地水嘅狀況。1991年仲成立咗斯德哥爾摩水獎(Stockholm Water Prize),專門頒發俾世界各地為水資源帶喺卓越貢獻嘅人同團體。每年嘅3月22號宣布得主,頒獎活動會於8月喺斯德哥爾摩市政廳舉行。唔止名銜,仲包括15萬美元嘅獎金,由瑞典國王HM King Carl XVI Gustaf親手頒發。

嚟斯德哥爾摩旅遊嘅朋友,如果唔怕水土不服的話,記得要打開水龍頭試試呢度嘅水喇!不過高質還高質,習慣飲熱水嘅朋友,記得唔好直接飲水龍頭出嘅熱水啊。因為熱水喉管嘅重金屬好可能會排到熱水裡面,嚴重嘅話會影響健康。

一名乾物女,過氣空姐,為愛由北區移居到北歐多年。熱愛地球同時喜歡講粗口,志願是能夠與動物溝通。


fb:為何斯德哥爾摩沒有譚仔三哥 by 三家姐 ig:sis3ter

Ranking
See All
See All
See All
See All

隱私權保護政策

請細閱並示意接受以下私隱政策及免責聲明,按下「接受」表示你已同意並願意接受 am730 網站內之私隱政策及免責聲明。了解更多