昔年任職娛樂新聞主管，律師教定一句百搭傍身，叫「唔記得咗」──遇到不能說的秘密(例如消息來源或線人身份)，上法庭遭盤問，講「唔答」太對抗性，講「唔係」直頭作假證供啦，都不宜，唯獨「唔記得咗」最穩陣。回憶這回事，誰敢誇永誌不忘？萬一形勢逆轉，又可以改口「忽然醒起番」，吹得我漲嗎？
不過，我被年輕人一句更絕的吹漲，叫「唔知」。居然還有這招！
「係咪拍緊拖？」「唔知。」「考試識唔識？」「唔知。」「溫書熟唔熟？」「唔知。」「食咗飯未？」「唔知。」「老竇姓乜？」「唔知。」虧他們答得出，吾輩大概一世想不出竟能咁敷衍。哼哼，果然廢青、宅男、hea女……
且慢，直至Shine的徐天佑提醒我：「唔係唔知，係唔想講俾你知。」我才懂，「唔知」，原來是「唔想講俾你知」的省略語。當閣下頻頻聽到「唔知」，別埋怨新一代水平低，可能只因頂閣下唔順，人家算客氣了。
徐天佑(還有黃又南)，豈非曾經大眾心目中廢青代表嗎？Shine又名嘥嘛，不經不覺卅五歲了，但總比較貼市。
人人都年輕過，即使不年輕，套用老歌也該明白，周星馳唱：
更多淒淒楚楚的遭遇，你不知道，亦不想講你知。
──徐小鳳《變色感情》
尤其為人父母者，子女愈來愈多「唔知」，是一個訊號，是時候放手。
二十年雜誌人，現職網上電視總編輯。
逢星期三刊登