「到底點先可以忘記一個人呀？」一位剛分手唔夠半個月，被回憶折磨得體無完膚嘅妹豬讀者問我。
分手後，曾經嘅刻骨銘心就變成最折騰人嘅部分；所以你發誓唔再去二人曾經到訪嘅地方、掉晒佢之前送俾你嘅禮物、將曾經上傳Social media嘅合照都刪除得一乾二淨。你變得焦慮敏感，禁止朋友喺你面前提起佢，甚至放棄埋你哋之間嘅共同朋友；你設法丟棄同呢個人有關聯嘅所有嘢，營造到呢個人彷彿從未喺你世界出現過一樣。
可惜任你去得再盡，稍不留神一個喺地鐵出現嘅身影、百貨公司專櫃飄嚟嘅香水味、一句歌詞，甚至根本唔需要任何提示都足以令你諗起佢。咁到底點做先可以忘記一個人呢？事實係，我哋根本冇可能逼自己嘅大腦去忘記一個人。任你再愛佢或者再討厭佢都好，我哋都冇可能去否定一段曾經。唔係勸大家沉溺往事之中，亦唔係叫大家藕斷絲連，但嘅然強行忘記一個人唔可行，仲有必要去逼自己做嗎？
調番轉嚟諗，佢嘅身影同講過嘅說話喺你腦中揮之不去，可是你嘅笑容同樣唔會有人取替到呀！反正我哋愈迫自己忘記就愈容易記起，倒不如接受曾經發生嘅一切，汲取經驗。想像自己係一嚿牛腩，而每段唔能夠開花結果嘅戀情都係人生嘅調味料。就係要細火慢烤，樣樣調味料都落啲，先能夠煮到食親都送幾碗飯嘅頂級五香牛腩呀。
落紅不是無情物，化作春泥更護花；每段感情都係獨一無二嘅，旁人永遠都無法體會到你嘅痛。但好消息係失戀並唔會令人傷心一輩子，而且經驗會令你成為更有智慧更有魅力嘅人。
喺唔傷害任何人包括自己嘅前提下，就將失戀該有嘅情緒發洩出嚟吧。想笑嘅時候盡情咁笑，想喊的時候去大哭一場，想呻就即管同家人朋友呻。直到有一日你哋偶然喺某個場合再次相遇，你會驚覺自己面對佢竟然冇再難過，因為原來你喺不知不覺間已經將他放下了。