「鄭婆婆，今次你遲咗成個月先至返嚟覆診，唔通你唔記得自己患咗骨質疏鬆，要每半年打一次針，以防骨質密度急跌而再次骨折？」
「蕭生，你知我係退休長者，靠積蓄同埋投資過活。點知我買咗好多年嘅一隻昔日藍籌股，竟然每半年派發嘅股息同債息都宣布唔派，搞到我今次連醫藥費都要問阿仔借住先。」
「鄭婆婆，你都係叫返我蕭醫生，而唔係『蕭生』！雖然我唔係『燈神』，但好多時醫生話骨質疏鬆唔及早治療，萬一跌倒就有機會骨折入院做手術，真係唔係危言聳聽，好似啲網紅咁嘩眾取寵博流量㗎！你知唔知每3位年過50歲嘅女士，同埋每5位年過50歲嘅男士，就有一位因骨質疏鬆而引致骨折。如果跌倒而發生髖關節骨折，仲必須入院做手術，日後先至有機會行得返。但髖關節骨折患者，一年內死亡率係超過兩成，你都咪話你唔驚呀！」
「俗語話『富不過三代』，蕭醫生你就話我嘅骨質密度T值係『負三』！不過我都慶幸自己嘅骨質密度，自從打針而開始止跌回升，雖然依家仲係負數。至於我手上嗰隻『大到不能倒』嘅股票，供過幾次股都可以由最高位大跌九成，股價仲年年創新低，總之我將啲錢花係健康度啦！」
「投資健康，供落自己身體，緊係好過投資股票啦！其實我哋骨骼嘅新陳代謝，同企業嘅盛衰過程好類似。年輕時成骨細胞較活躍，令骨質密度維持高水平，就好似企業處於第一代嘅發展階段。但隨住年齡增長，新陳代謝減慢，蝕骨細胞變得活躍，骨質密度就開始見頂回落，正如企業傳承到第二代就盛極而衰。當女性更年期後荷爾蒙分泌減少，更會令鈣質加速流失。情況就好似企業交棒俾第三代，仍然沿用舊世界觀嚟面對新世界局勢，結果經營不善，往往都變成『債冚債』嘅困局。如果連大到不能倒嘅雷曼同恒大都俾債權人清盤，患上骨質疏鬆嘅長者，又點先可以『老而不能倒』呢？」
「唉！治療骨質疏鬆，又要補鈣，又要曬太陽做運動，仲要打針食藥，過程就好似孭緊一條還息唔還本嘅永續債咁！既然大部分內科藥都要食成世，咁我打緊嘅『骨針』又有冇打完嘅一日㗎？」
「治療骨質疏鬆嘅藥物，除咗用口服或者針劑嚟分類外，從藥理角度嚟睇，可以分為促進新骨製造，同埋抑制骨質流失『兩大家族』，正如本地四大家族都有進攻同防守嘅業務。你一直打緊嘅彷保骨素針，就屬於抑制骨質流失嘅藥物。根據香港骨質疏鬆學會最新嘅指引，如果貿貿然停打彷保骨素針，會導致骨質急速流失，增加脊椎骨折嘅風險，所以我建議你繼續打落去。假如直係要停打針，就要以另一種藥物雙膦酸鹽嚟替代，仲要定期去監測骨質密度。」
「原來冇跟足每半年打針嘅指引，後果同企業唔派半年一次嘅債息一樣，都會打開脊椎『撐唔住』嘅潘多拉盒子，隨時引發骨折嘅骨牌效應。以後我都係乖乖地準時返嚟打針，費事脊椎好似某樓盤混凝土強度不足咁，需要成幢拆卸重建啦！」
作者為骨科專科醫生