《妻迷Yerma》由甄詠蓓(Olivia)執導。
《妻迷Yerma》朱栢謙、唐詩詠。
近月本地劇場界非常熱鬧，繼5月接連有多齣劇目公演後，踏入6月依然精彩連場，其中一套焦點大作，是將於6月27日在灣仔香港藝術中心壽臣劇院開鑼的《妻迷Yerma》。此劇由甄詠蓓(Olivia)執導，「劇帝」朱栢謙、「視后」唐詩詠，以及「香港其中一位最靚聲的歌手」RubberBand主音6號(繆浩昌)聯合主演。
故事改編自西班牙劇作家羅卡(Federico García Lorca)於1934年創作並首度公演的同名經典劇作《Yerma》。「Yerma」在西班牙語中意指「荒蕪的」、「不毛的」或「不育的」，多用以形容缺乏生命力、無法孕育果實的土地。羅卡將此辭彙用作劇名，既象徵女主角不育的命運，也隱喻其內心世界的空虛與壓抑。她的身體如同一片乾涸貧瘠的土地，一直冀盼天降甘霖，最終換來的只有無盡的淚水。
劇本面世將近一個世紀，終於有機會搬到香港舞台演出，並且命名為《妻迷》。究竟這個「妻」在「迷」的是甚麼？演繹「妻子」的唐詠詩說：「佢首先迷上呢個BB(生育這回事)啦，又迷上兩個男人(丈夫、前度)啦，然後再迷上喺自己個世界入面啦。大家可能會覺得，一路講緊《Yerma》都好似一個(關於)生唔到小朋友嘅女人，但除咗呢樣嘢之外，佢心底裏面一直對抗住『點解我會唔得㗎』、『點解命運要咁樣』，我覺得佢有少少都係有對抗住命運。」
朱栢謙飾演的是個怎樣的丈夫？「我飾演好愛老婆嘅丈夫，但當然喺老婆角度應該未必係，哈！同埋佢個事業心好重㗎……佢好上進嘅，但有時太過上進、太過進取，就會忽略咗身邊最重要嘅人，之後就引發咗好多事件。」難道因此給予機會讓「前度」成功comeback？6號馬上否認這種推論：「冇冇冇！嗱我係前度，但冇乘虛而入嘅動作，我係咁啱喺呢個時間出現。」他說「前度」的身份是「妻子」多年前在中學時代的puppy love，「中學畢業之後已經冇再聯絡，但係以前真係好快樂嘅，喺『妻子』而家面對生育呢個咁大嘅課題，我嘅出現又令到佢諗好多嘢。幾次嘅相遇都係好似不斷話俾佢知：你有好多選擇、你仲有第二啲選擇。唔係淨係呢樣嘢，我覺得嗰個相遇其實都幾sad，我自己第一次接觸呢個角色，發現原來佢個背景係咁樣㗎？但詩詠個角色仲慘，對我嚟講。」「丈夫」慘嗎？朱謙坦言看完劇本後馬上胃痛：「胃痛咗一日，好傷心，然之後我就問：天啊，點解又係我要做啲咁heavy嘅嘢呀？！」
在旁的導演甄詠蓓接力解釋，《妻迷》中的「迷」，可以理解為「迷失」、「迷惘」或者「執迷」，故事主旨是：假若生命說不，我們該如何自處？「我哋每個人都有一種慾望，好想要一啲嘢，但係事與願違，好多時生命佢唔會俾你，就係好似詩詠個角色，佢好想要一個小朋友，但係佢不育，生唔到……咁呢個時候你會做啲咩嘢？所以簡單嚟講，就係一個人佢點樣去面對一啲不可能，(當)生命同你say no嘅時候，究竟你係繼續迷戀落去呀，執迷落去呀，定係還是算啦，不如你放棄啦？你做乜咁偏執呢？其實我哋生活上有好多……有陣時我哋執着住某啲嘢，捉緊住好多嘢。(但)有陣時我哋捉緊嘅係一件好事啊，定係其實呢種捉緊會令到你去到一個好悲劇嘅結局呢？」
難就難在人類從來都是群體動物，很多旁觀者都習慣「加把口」講講自己所想，所以一個人的難題，往往不是一個人的難題，既令事情變得複雜，亦隨時改變命運走向。甄詠蓓續說：「呢個故事其實係講緊，好多喺佢(妻子)生命中出現嘅好多個人，其實點樣影響緊自己。不斷有啲聲音話俾佢聽：你不如放棄啦，或者有啲人，譬如6號飾演嘅前度就會話：『喂，唔係喎，其實你可以繼續追求你自己嘅理想』。所以有陣時喺我哋嘅生命入面，當我哋好有夢想去做一件事，有啲聲音會話：『No！不如你唔好做啦！』但有啲聲音會話俾我哋聽：『喂，不如做啦！』所以一個人喺呢種struggle(掙扎)入面，佢究竟應該要點樣繼續去把持自己，究竟佢堅持落去係值得表揚呀，定係你堅持落去係戇居呢？」