香港原創舞台劇《我們最快樂》
幾經轉折，香港原創舞台劇《我們最快樂》(We are gay)將於2025年11月28日至12月4日，假西九文化區戲曲中心大劇院再度「與眾同樂」。團隊周三(10月15日)首次齊人開會研究劇本，稍後將會開始排戲。
若說每齣作品都有它自己的命運，《我們最快樂》可謂命途多舛。翻查紀錄，2019年10月31日，是我首次撰寫這套舞台劇的相關報道，它作為「第48屆香港藝術節」的重點演出，原定2020年2月14日情人節當天首演，合共16場。「鐵三角」陣容包括游學修、劉俊謙和張錦程，宣傳海報出爐後，馬上引起一眾劇迷、同志、腐女熱烈討論。然而世紀疫症突襲，該屆「藝術節」過百場演出悉數取消，《我們最快樂》亦不能倖免。2020年2月11日，即公演前三天宣布取消，五年後的今天，負責創作劇本的劇作家莊梅岩(Cancer)仍然記得當時的情景。
「我哋真係下個禮拜入台，然後政府就話要閂場館！」那時候農曆新年過了不久，大夥兒在排練室為演出作最後衝刺。Cancer說：「我哋成班人做完最後一個喺排練室嘅final run之後呢，藝術節嘅同事就嚟排練室嗰度講：『我哋要cancel！』完咗之後我哋成班人就落咗去……唔知點解揀咗何文田街嗰間『Sweet 19』café，就一齊食咗餐飯。」散席後沒多久，這個城市以至整個世界都陷入一片陰霾中，所有事情停擺。及至2021年10月，主辦宣布《我們最快樂》將會在2022年「第 50 屆香港藝術節」公演，惟劉俊謙的角色已由梁仲恆接替；去到2022年3月，此劇再因為第五波疫情延期，直至同年11月初，這位「苦命寶寶」才能夠在戲曲中心大劇院的舞台上正式「出世」。
回到起點，這個劇本之所以誕生，是Cancer主動邀請初代導演黃龍斌(Tony)合作，共同開發一個圍繞同性戀者的故事。「因為我一路睇佢嘅作品呢，我覺得佢嘅導演風格都係好特別，佢好有自己嘅風格。但係你都知睇開我嘅戲，我(故事)好『實的的』㗎嘛，好寫實，我就好鍾意同一啲導演合作，然後喺佢身上攞啲靈感去誕生一啲唔同嘅嘢。」
另一個激發Cancer的創作關鍵，是她想再次涉獵暗黑主題，「我睇佢Tony嘅嘢，我覺得dark dark哋，我覺得我唔係全部都係dark，我有啲好陽光、好天真嘅戲㗎嘛。但我成日都話寫完《聖荷西謀殺案》之後，我多咗一個dark嘅櫃桶，久不久我就想開嚟去呈現一下人性。」Cancer說，《我們最快樂》的三個角色：Philip、阿生和Neil，是為劉俊謙、游學修和張錦程度身訂造，作為建構人物性格的基礎：「我哋想搵呢三個artists，然後base on佢哋，我寫咗一個咁嘅愛情三角故事。」
Cancer笑言，因為想再次挑戰一個黑暗題材，才有後來《我們最快樂》作為劇名的決定，靈感源自十多年前出版、由美國記者Barbara Demick撰寫的紀實文學著作《Nothing to Envy: Ordinary Lives in North Korea》。其繁體中文版書名為《我們最幸福》，至於英文劇名是《We are gay》──「gay」既可作名詞，意指「同志」；亦可作形容詞，意為「快樂」。短短幾個字，既回應劇作主題，也把文字遊戲玩到極致。「我覺得《我們最幸福》呢個書名好dark啊，不如我哋用『我們最快樂』嚟形容同志群體，因為我覺得香港嘅同志權益，都仲係比起好多發展咗嘅國家其實係落伍。但我哋呢都仲係好似覺得自己好開心啊，即係好似要令自己覺得開心咁樣，所以不如用『我們最快樂』。」
相隔三年，《我們最快樂》再度公演，緣分何來？Cancer承認，今次同樣跟黃龍斌有關，「我哋首先book咗(場地)，想再同Tony一齊再去做一啲嘢。後尾諗諗下，都係覺得不如再做《We are gay》，即係好似好唔信邪，不過因為嗰個cast其實已經經歷得太多喇，不如我哋再重新cast過。」他們率先邀請「大師兄」黃秋生飾演Neil，後來因為回歸母校任教的Tony，獲擢升為香港演藝學院的戲劇學院署理院長，公務愈見繁忙，無暇兼顧今次重演，遂邀請去年憑《植物人》獲頒「第32屆香港舞台劇獎」最佳導演(悲劇/正劇)的「大欣」黃呈欣執導，而經過試鏡之後，阿生和Philip兩個角色會由林家熙(Locker)和梁浩邦飾演。