世界盃如火如荼激戰中，分組賽第三輪(11月29日開始)更每晚踢四場，由於時間重疊，不想錯過任何入球的朋友，只好同時開電視和用平板電腦看直播，連續幾晚這樣子，「齋坐唔郁」都覺得攰。
去到周六(12月3日)，16強大戰開始，每晚兩場，頭場晚上11時開波，尾場凌晨3時接力，散場時已是香港時間清晨5時，假若翌日還要準時返工，精神狀態可想而知，收工食完飯之後都想盡量補眠「叉電」，怎會有閒暇留意其他電視台播甚麼新節目？
2230節目有睇頭
事實上，當今娛樂節目選擇如此多，唔睇波都可以出街睇騷睇戲，就算留在家中，也可以長開Netflix「與世隔絕」（相信近日很多人都在追看滿島光與佐藤健主演的日劇《First Love初戀》），所以免費電視台想吸引觀眾轉台，爭取話題與收視，難度極高。幾個不約而同在本周推出的10點半新節目，包括ViuTV（99台）的《超識玩》、J2（82台）的《仔仔一堂》，以及HOY TV（77台）的《就是青春》（轉新時段），在網上的討論度全遭世界盃蓋過。
但公平點說，正因為有J2和HOY TV「參戰」，而觀眾緣不俗的ViuTV(忠粉多，播乜都睇)和正值台慶月的翡翠台亦雙雙推出重點節目：前者是超市贊助的益智節目，有強尼、葛綽瑤(Yoyo)和許寶恆(Alice)主持；後者衝出香港，先有黃翠如遠赴瑞士、敘利亞、摩納哥及摩爾多瓦拍攝的《遊走世界天與地》，再有張寶兒、姜麗文和蔣家旻輪流主持的《45日環遊日本》、令到近年吸引力愈來愈弱的「10點半綜藝橫線」，忽然間變得頗有睇頭。
睇仔為先
奈何時間永遠不夠，只能夠揀嚟睇，首選當然是《仔仔一堂》，原因很簡單：好奇心和好奇心。第一個好奇心必然是「睇仔」，好想知道到底參加節目的10位仔仔是否位位「高汁」，令人心心眼不斷？看了頭兩集，似乎任職科技金融合規及風險管理主任和Louis，和任職大學研究院講師的Andrew稍稍領先，且看往後集數會不會有「黑馬」殺出。
其次，亦是最重要的一點，是TVB作為一家素來絕非Gay-friendly(同性戀友好)的電視台，這個由總經理曾志偉拍板力撐的香港電視史上首個男同性戀者配對真人騷，最終出街的節目內容和拍攝手法如何？是掛羊頭賣狗肉，抑或透過節目，嘗試扭轉市民對性小眾的既有看法和偏見？據了解，本周重點是第五集(12月2日播出)，名模馬詩慧會跟10位仔仔圍埋傾，透露作為母親面對女兒(王曼喜)出櫃的心路歷程，10位仔仔亦會坦誠分享作為同志，怎樣面對來自家庭和自我身份認同的壓力，部分人更講到喊，場面真摯感人，我有幸先睹為快，所以才能夠說出這番見解，不過節目能否持續真誠，去到最後一集，仍有待觀察。