Jer個唱的療癒儀式

以下非引戰文。

做得呢行，識得多幾個人，講真近年好少要為演唱會撲飛。上個星期做咗一次，為咗柳應廷阿Jer。

其實原本有人邀請我睇，但係大埔火災發生後，我真係冇乜心情睇演唱會，張飛轉贈朋友。但演唱會首場當晚，用手機碌緊大量火災資訊，心情沉重期間，突然彈出通知阿Jer有Live，原來佢安排咗演唱會唱《人類群星閃耀時》IG live，見到全場亮起手燈大合唱，係我喺大火發生以來首次流淚非因悲痛，而係釋放。

我立即撲飛睇尾場，經歷咗一場療癒嘅儀式，為抑壓多日嘅情緒搵到出口。《人類群星閃耀時》︰「殞滅時分秒，看人類即使渺小，誰在說我愛你那刻，情存萬有才是美妙。」《大海少年》：「也許這世間已再不善良，也許這瞬間已慣於哀傷，看守那心底真正土壤。」阿Jer嘅歌從來唔係典型勵志歌，小克嘅詞仲有啲深奧，但原來喺大家傷痛嘅時候就會發揮作用，感受到一股力量。亦令我記起，幾年前都係阿Jer嘅《物語》三部曲，陪我經歷疫情時嘅低潮。演唱會前幾日遇上世紀級火災，可能有人覺得開騷Timing錯晒，但入場睇完，我真心感謝佢堅持開騷，同個騷主題《The Shape of Breathing》一樣，喺呢個時刻俾大家一個空間重塑呼吸，重新起步。

另一方面，我見到大家就藝人捐錢又有爭拗。軒公寫信俾受災粉絲附上一疊千元現金，有人又質疑「扮低調、實高調」；Sammi話為災民祈禱又被人質疑「齋祈禱、唔捐錢」，要當事人澄清一早捐咗一百萬，被迫「低調變高調」。

我覺得，藝人喺災難下可以發揮嘅力量有好多，除咗捐錢，透過音樂同作品傳遞希望與力量，更能撫慰同鼓舞人心，俾錢都買唔到，希望大家都諗多一步，用音樂跨越語言與文化界限，凝聚力量，影響力同捐錢同樣重要。