Better姜B

姜濤完成咗第二次個人演唱會《KEUNG TO "LAVA" LIVE 2025》，場數比第一次演唱會翻倍，從舞台設計、音樂風格到嘉賓陣容，都睇到姜濤成長咗唔少。呢兩年發生喺姜濤身上嘅事我諗大家都清楚，今次演唱會展示咗一個蛻變後嘅姜濤。

姜濤出道以來，大家都讚佢年輕有為又善良，係大家最喜愛嘅「姜B」，但有晚姜濤分享環節，佢大爆自己其實有兩面，另一面嘅姜濤A係經常被情緒主導嘅人，仲會發癲同亂掟嘢，但呢一面只係得身邊嘅人見過，仲爆花姐都話頂唔順，二人曾經因為嗌交，搞到花姐要食血壓藥，同時亦傷害咗佢身邊好多好珍惜好重視嘅人。姜A同姜B似乎同演唱會主題一樣咁兩極，姜B願意公開自己非善良嘅一面，我覺得肯面對真正嘅自己都係成長嘅一步，讓觀眾感受到他內心的掙扎與成長，更期待佢進化成姜C，成為「Better姜B」。

個人成長以外，我相信姜濤嘅事業亦都會進一步拓展，從演唱會嘉賓名單就可見一二。姜濤邀請咗本地歌手以外，仲有兩位重量級嘉賓：王嘉爾(Jackson Wang)同蕭敬騰。王嘉爾係國際級藝人，蕭敬騰就係華語樂壇嘅實力唱將，兩個人嘅共通點係喺內地市場比較活躍，深受內地觀眾喜愛。兩位嘉賓嘅出現，我可以大膽判斷，姜濤即將打入內地市場，同呢兩位嘉賓同台演出，除咗提升演唱會話題性，更有助於佢喺內地市場建立更強嘅曝光率，從而建立認受性。

事實上，姜濤同內地市場一直都有關係，參加《造星》前，已試過參加內地嘅選秀比賽，《造星》成名作《一二三我愛你》都係內地歌曲，加上佢都有出國語歌，想進一步拓展佢嘅事業版圖，特別係向內地發展，可以話係一直都有跡可尋。大家或者亦都有留意到，今次演唱會有用到內地嘅賣飛平台，場內我都見有來自內地嘅歌迷，似乎一切已為佢未來更廣闊的舞台做好準備。姜濤係唔係可以「紅過羅湖」，2026年拭目以待。