AK新MV成本冠絕全行。
姜濤又被傳有女友，fans對偶像拍拖。一般有三種心態︰第一，愛佢愛到想嫁俾佢，偶像拍拖就冇晒fantasy。第二，佢快樂所以我快樂，如果偶像識個善良好女友，會戥佢開心，但如果佢揀埋啲拜金港女，我會好失望。最後一種心態，唔介意偶像有冇拍拖，但接受唔到佢講大話，有就有，冇就冇，講大話唔真誠就扣分。
作為偶像，拍拖究竟講唔講好呢？講就會得罪第一類人，又可能有一半第二類人覺得你女友唔好，而得罪埋佢哋。唔講呢，最多得罪第三類人。根據邏輯，偶像拍拖係唔應該公開。
Fans以外，仲要睇公司取向，我聽過行內有經理人，直程會用近乎恐嚇藝人(同另一半)，迫佢哋分手。我相信MIRROR冇呢個情況，有啲成員一出道就公開有女友，個個之前亦傳過緋聞，都冇人被雪藏，我相信就算唔係100%自由，佢哋都肯定係有最高戀愛自由度嘅一班偶像。
跟住講男朋友。
我想分享近排有件好有趣嘅江湖傳聞，關乎某成員嘅男性朋友們嘅。有冇睇AK新MV？去美國拍又大屋又金髮美女，我一直都好鍾意AK，雖然佢唱歌一般，但個人好似好有義氣，同埋真係靚仔。所以當我知道佢拍呢種咁glamours嘅MV時，我好期待會做到好似美國啲rapper咁有型。
但我睇完個MV，都唔知自己睇咗啲乜，成件事超空洞，好似睇啲stock photo咁，拍得又唔靚，行行企企，冇內容又冇內涵，直程好似影住一個土豪去美國，用錢逼啲model著比堅尼陪個自卑亞洲男一日咁。
我只見到一樣嘢，貴﹗
據聞MIRROR個人同團體嘅MV成本冠絕全行，比其他公司歌手貴一倍以上。但呢個MV，傳聞直程拍到六、七個MV！點解會咁？江湖傳聞，拍攝團隊係AK一班好好嘅兄弟，佢哋叫AK咁拍又收得勁貴，一向有義氣嘅AK為幫朋友，亦冇諗真值唔值，就決定去拍，拍完先俾張單公司，想救返啲內容都救唔到。
一個藝人有冇得紅，好睇佢間公司；一個藝人有幾紅，好睇佢自己；一個藝人紅幾耐，就好睇佢識咗啲咩男女朋友。