MIRROR與大劉的距離

姜濤因被質疑咪咀，以真身反駁網民，最終姜濤道歉收場。誰是誰非，唔係本文重點，我反而由事件嘅起因著手，八下究竟姜濤當日演出究竟係唱現場定咪咀，知情人士話係唱現場，仲話姜濤就算要跳勁舞都唔會咪咀，何況當日又唔係要勁歌熱舞。

同日另一焦點人物係大劉劉鑾雄，開記者會怒斥有人請網軍造謠，由佢出手幫過嘅「賤人」，鬧到《愛．回家》嘅硬膠樣女演員。而姜濤咪咀單嘢被人講足成個星期，明明唔係事實，但佢只係出個IG story話「沒甚麼好說的，繼續努力」，有的沒的。係咪公司唔識處理、懶惰、唔上心呢？

其實如果你細心觀察最近一年，就會發覺MIRROR面對謠言嘅頻率，同大家每日收到嘅電騙數量差不多，去到一個地步係唔需要聽佢講咩，已可直接收線。就講返姜濤反駁網民同日上晝，有雜誌引述讀者報料，話花姐遲咗職，被Anson Lo 私有化，而MIRROR會分AB team， 由Anson Lo揀人。花姐辭職3個月前已傳過一次，亦已否認咗，今次謠言加咗碼，講到Anson Lo決定隊友前路，做咗魯生、金生個位咁。花姐同Anson Lo都分別出咗story否認，但相信下一季又會再傳一次。第一次可以話係造謠，但不斷造謠，咁加埋就係一個設局……設一個騙局。

面對早晚各一單嘅騙局，如果每次都以大劉程度回應，咁會點？1)有次細力啲回應咪會俾人覺得係真？2)正經嘢唔使做？有關佢哋嘅新聞都係回應騙局，咁咪中晒「騙徒」計，令佢哋從中得利？利，可以係錢，可以係機會，可以係「睇到佢/佢哋麻煩就開心」嘅快感。又或者係消耗MIRROR資源，花邊化佢哋，到時邊個會得益？

大劉開記者會人人期待，公開鬧人嘅金句更成為香港人嘅花生，藝人/公司公開反駁謠言，就被人話食得鹹魚唔抵得渴。佢哋同大劉嘅距離，並唔止身家。