墨魚遊戲引伸的3個問題
YouTube頻道「試當真」停止營運前告別作《墨魚遊戲2》，邀請100名藝人參加拍攝，比3年前第一集陣容更龐大，但同樣亦引起幾多關於版權問題嘅討論，好多叻過我嘅專家都已經分析過，在此不贅。反而我想探討另外3個問題。
1. 今時今日，乜嘢平台仲可以集合大量跨界別藝人？睇下傳媒整理嘅百人名單，都算星光熠熠，跨平台亦跨界別，有劉以達、鄧兆尊呢啲稀客，擺明係用嚟製造話題點嘅人；亦有錢嘉樂、洪天明呢類大台味濃嘅；當然唔少得大量網絡平台常客。光譜未至於完全涵蓋，但界別之廣都係屬於少見。點解今次可以做到？其實好簡單，以前我哋會話媒體小器唔俾人上節目，今時今日更多情況係，藝人覺得冇着數，所以唔上。而一個網絡頻道搞嘅節目，對藝人嚟講，以小博大，又較少傳統媒體嘅利害衝突，博得過，有着數，所以咪去。雖然，現實係幾日嘅網絡話題未必等於實際利益，但咁咪當流量囉，刷下存在感，觀眾又可能覺得你年輕啲，冇蝕底。
2. 由藝人主理嘅公司係咪較容易成功？「試當真」呢個頻道有個特點，就係創辦人以及非常支持佢哋嘅老闆都係藝人，呢種背景嘅好處係，能夠同其他藝人更啱嘴型，傾合作可能會容易啲，所以由藝人話事嘅公司好多時都會有一定嘅優勢。但係我覺得呢個只係局部優勢，會去到一個玻璃天花板。
因為去到最後，如果要將公司搞大，仍然係需要專業嘅管理同埋做生意嘅能力，同藝人關係好呢樣嘢唔可以帶公司突破到去嗰個位。放眼國際幾間最大嘅娛樂公司，好多都係由專業管理人管理，但我強調嘅係任何人，包括藝人，只要有呢個能力其實一樣可以做到，當然藝人做管理係會有一啲可能嘅盲點，就係有機會過分着重自己形象多於公司營運。(頭盔：都係睇人啦。)
3. 以上兩點都係反映由藝人主理嘅平台，其實都有佢嘅發展空間，但咁都要執，證明有流量唔等於有錢賺，所以最後嘅問題係：到底為乜仲要搞媒體？