今次想講「刪post」這回事。
這個社交媒體氾濫的時代，網上同人開拖好平常，刪post更是當食生菜。藝人按捺不住發文引起軒然大波，第一反應多數都是delete，覺得可以盡早止血。技術上，沒有錯，刪文有一定威力：原帖會消失、連結會失效、演算法會停止派送。如果夠快，在別人截圖前彈弓手，可能真的會執返身彩。
但好可惜，當今世代哪有「冇人cap」這回事，只要有留痕跡，就自然有人留底，然後就有人轉載，結果刪完等於沒有刪。
刪post在傳播上更似一個反向訊號。有沒有留意傳媒最鍾意寫「惟最後刪除帖文」之類？因為這句本身都好有戲劇元素，原本可能是茶杯裏的風波，就因為刪文，變得有懸念，變得更似有陰謀。對普羅大眾來講，刪post才是另一個開始，他們會開始問：「做乜delete？」「係咪有人施壓？」令傳播節奏反而加速，等同為整個討論開三盞綠燈，變了愈想低調，就愈見顯眼，愈想消音，就愈多回音的情況。
即是刪文完全冇用？未必。它在公關層面上是一個gesture，未必救到你，但起碼讓人覺得你識do。對品牌、對公司、對公眾都有一種「我識收手」的象徵作用。風頭好快就會過，到其時大家都會let it go，就算仲有幾丁友繼續講，3、4日後都自動收聲，人好善忘，亦好易被分散注意力。
你守得住其實就已經贏，但不是個個都守得住，好多人會覺得不出聲就是認輸，不解釋就是食死貓。
193這個例子好經典。他Threads出文，講自己送月餅給Lolly Talk遭退回，更被對方經理人屈「因負面新聞收回月餅」，仲開投票問邊個講大話。結果一石激起千重浪，回覆者眾，又引來大量傳媒報道。刪文這一步，本來好正確，公關上可以有個交代。可惜，第二日他又忍不住，開多個post向網民開火，話自己是「俾面佢哋金主先delete post」，而「事後有人已經認咗錯」，再補一句「我係非常理直氣壯」。這一步令所有止血都變成放血，整件事的狀態亦由冷靜變成反擊，又準備炒多一波。
可以點樣收科？就是刪埋這個新post，而他最後亦刪了這篇補刀文。這是他唯一能做的正確動作，只不過已經錯過了收科最好時機。
這種情況在娛樂圈並不罕見。好多藝人以為補刀是「澄清」，但在傳播來講其實是火上加油，令件事更加long-lasting。你一出多句，就等於給別人一個理由回應你10句，你要記得網絡世界並非個個都是朋友，100個人入面總有幾個人對你抱有惡意。講真，刪post其實唔難，一個掣而已，識得收口先係難得。