發不發覺，好看的廣告少了？乾脆你記得的廣告也少了？
在電視黃金時段出條片，千金一刻，細公司見不到門檻。既然投資大，搵4A撚橋撚畫面撚到靚，唔慳得。當年，一台獨大，觀眾空檔時間都懶得轉台，眼定定撈埋廣告汁，自然深刻。
但現在，拍得靚還有用嗎？答案係無用。多媒體、口味碎片化年代，即使煲劇迷，一播廣告必然搞搞手機搞搞別的，誰還願乖乖接收訊息？同理，以前認為擺地鐵燈箱，月台等車時不愁乘客不睇；你如今倒看看有哪位乘客唔係低頭族？
惡性循環，不能鬥品味，唯鬥洗腦了，反正觀眾不會細心欣賞，不如以醜為美在網上狂轟濫炸更好。對，網上宣傳豐儉由人，過往沒考慮過賣廣告的生意仔也加入戰團。事實已經證明，顧客不再崇拜精緻，寧愛KOL的homemade feel。
而KOL甚麼葫蘆甚麼藥往往估佢唔到，例如林作次次自撲出來犯眾憎，我懷疑他是否故意的？他背後頗多瓣數，你睇完鬧完，至少留下印象，下次會否間接惠顧其相關產業呢？便是我所說的以醜為美和洗腦式。
4A精英不屑這樣做。以前，那是一片高地。八、九十年代中產影劇喜歡用廣告公司做背景，從事creative和商品攝影師猶如優皮士象徵，創意受尊重。急景殘年，所謂：「誰愛風流高格調，共憐時世儉梳妝。」神話破滅，香港再養不起優皮士。