徐浩同曾樂彤拉埋天窗，現場星光熠熠。有傳媒形容到場嘅MIRROR成員多過叱咤，賓客跨唱片公司又跨界別，由巨星到新星，再由高層到幕後，不同單位都有出席。婚禮場地到布置再加埋一身行頭都係頂豪華級別。令我好奇，乜而家音樂人咁好搵咩？
徐浩其實同好多歌手都有合作，但傳媒都係喜歡形容佢係「MIRROR御用音樂人」，或者反映MIRROR及一眾一線歌手，近年的確帶領樂壇蓬勃返，多咗嘢做。但同時亦價量齊升，聽講製作一首歌同MV嘅成本近年大幅提高，尤其MIRROR好多跳唱歌，呢類音樂同MV嘅製作成本，都比一般歌曲高。其實多咗人聽，多啲人睇，多啲工作，對全行都係好事，但成本升得急，圈中私底下都有微言，不滿MIRROR令幕後成本猛咁加價，即使樂壇蓬勃返，經營仍一樣困難 。
電影圈其實都有類似情況，技術人員嘅人工居高不下，係電影業挑戰之一。大家都知道八、九十年代係港產片黃金時代，帶動電影圈起飛，機燈組同道具化妝等等幕後團隊嘅日薪都開始上漲，到2000年期間，合拍片更令佢哋薪酬倍升，加上呢班幕後人員嘅工會，幾乎年年都成功爭取加人工，久而久之薪酬就累積到好高。我有聽聞過，當導演係搭巴士去拍攝現場，演員係搭的士去，而有幕後技術人員，係揸保時捷返工嘅。今時今日，電影市道回落，合拍片幾乎消失，但一班技術人員嘅薪酬水平仍然高企，每日一開工，唔理拍咩戲，淨係計技術人員，都有一個好高嘅最低消費。有經驗嘅技術人員唔會俾個價跌，加上已上晒岸唔等工開，但新人就冇工開亦冇機會。
當然，幕後人員係創作嘅重要一環，好景嘅時候係應該分享到成果嘅，但會唔會有一個機制可以令薪酬有彈性啲。否則全行冇人投資，新人無論係幕前定幕後都冇機會，結果相信大家都唔想見到。