特區政府已到了做乜錯乜地步，擬取消DSE中英文口試、校本課程和兩篇範文。用常理諗諗都知道又錯。
假設某些學校或考生強項專攻這方面，某些索性未教，一來一回，機會成本，前者白費工夫，後者賺取了時間修習別的範圍。
考試是賽局，首重公平，考生由中四開始等如押上注，等待明年揭盅，哪有一個遊戲運作了三分之二才忽然改規則的？你倒去葡京試試？
如果話，當局好心驚受疫情影響教唔晒學唔切，傻啦，舊制會考中文科幾十篇範文都得，現在減去兩篇才共十篇，學校和考生會自然調節，多有多的略教略讀，少有少的精教精讀，我敢說，即使減剩一篇，勤力者依然鑽到佢出血為止。
順帶一提，舊制中文根本沒口試，無所謂，我們由開始讀的一刻知道就得。請記住，填鴨式教育考甚麼都無謂，最緊要公平。
如果話，憂心明年口試依然存在肺炎風險，何等失敗，尚有大半年就打定輸數想不出法子？戴口罩考得唔得？分批在獨立間格用zoom得唔得？日日開無聊記招又得？和稀泥幫政府解套說，學過知識（包括《六國論》和《岳陽樓記》）總屬於自己，仲嘥氣，你知道考生花多少死力去鋤一篇範文嗎？世間上比《六國論》和《岳陽樓記》可愛的文章和事情多的是。
比特區政府可愛的，更多的是，可憐我們卻要和它做人世。
[email protected] 逢星期五刊登