肥媽評輝智唱《記憶棉》是「你要死唔俾你死咩」。
家中長輩非常鍾意睇《中年好聲音2》，剛播完的總決賽當然也不例外，聽得如癡如醉，亦睇得相當肉緊！長輩一向支持外表斯文四正、留有清爽短髮的頂頭大熱譚輝智，欣賞他聲底靚、技巧佳，更like爆他翻唱陳慧嫻的《歸來吧》(好記得肥媽點評時講到喊)。所以和好多觀眾一樣，好希望這位素人\摘下桂冠。
可是，決賽當晚成功殺入最後三強的譚輝智忽然「不智」，在最後階段「必殺歌」捨棄經典老歌這個拿手好戲，改唱年輕歌手MC張天賦大熱作《記憶棉》，搞到他的實力未能百份百發揮，最終只能屈居亞軍，將冠軍寶座拱手相讓予參加過《亞洲星光大道》的古淖文。
譚輝智事後受訪表示不覺揀錯《記憶棉》，但評判和觀眾反應已反映一切，肥媽忍不住鬧「你玩緊我哋」、「你要死唔俾你死咩」，現場觀眾歡呼聲亦明顯與他表演許志安《想說》和張學友《屈到病》時有分別。至於家中長輩的反應更爆趣，他不是彈譚輝智假音未夠準繩，或是唱法未夠鬆，而是說：「做乜揀首冇咩人聽過嘅歌？」
MC的《記憶棉》年半前推出，當時極速橫掃各大音樂串流平台排行榜第一位，亦在不同電子傳媒音樂榜單中拎過榜首殊榮，MV在YouTube的觀看次數更逼近2,900萬次，是平台上廣東歌Top 10之一。明明唱到街知巷聞，又試過在TVB的「勁歌金榜」排第一，為何會淪為「冇咩人聽過」？其實答案好簡單，就是MC本人極少在TVB亮相！除了零零星星的娛樂新聞報道，MC親身出現在大台節目的次數，認真10隻手指數得晒，如果你少上網、少睇其他台，原來真的會誤以為MC是一個有潛質，但仍是半紅不黑的歌手。
這裡不是想講譚輝智臨門撻Q都是MC的錯，而是想說本地娛樂行業裡面，確實存在各個河水不犯井水的生態系統，就像走獸和海魚，兩者基本上互不干涉，各有各搵食，就例如MC不靠大台鋪天蓋地大力助攻，紅館演唱會照樣場場爆滿，又例如大台不需要矚目新星MC頻密亮相，照樣吸引大量觀眾收睇節目。所以，有時候見到社交網站上各陣營互相口誅筆伐、單單打打，真心感到無謂、浪費氣力。
回到譚輝智揀錯歌件事，如果他當初投其所好揀另一位MC——肥媽Maria Cordero的歌，結果又會否一樣？我真心相信命運一定能夠改寫，他唱肥媽名曲《要爭取快樂》的話，最後一定得嘅得嘅得嘅得嘅，不會嘥氣！
