英帝疫情無得救。八卦圈傳言，波叔病好之後，性情大變。病發前，佢主張唔解禁，唔封關，唔好打沉經濟。病好之後，雖然唔可以即刻工作，但唐寧街10號隻貓居然識得講人話，話波叔依家盡信真正病學專家之言，唔同意早解封博一鋪，令部分閣員好冇癮云云。老實，死過翻生，唔信病毒專家唔通信經濟學家？外界有批評話，波叔入到去ICU都冇插過喉，真係霸住個床位。唐寧街10號隻貓引述御醫話，呢個說法真係有問題，唔通要等到扯晒蝦無晒氣至入去ICU咩？
唔講唔知，聽貓貓講，原來御醫響英帝醫學界，屬於死都唔插喉派，佢地同插喉派係兩個唔同處理方法。死都唔插喉派相信，病人除非去到最最最最迫切之時，都唔應該插喉，因為係唔係都插喉會加快上天堂。咁御醫點都唔插喉，就響ICU第二日，波叔靠自己身體硬挺過去云云。呢個經歷，對波叔有乜嘢影響？咁至少相信，戴口罩係有用嘅。全球至八嘅英帝太陽報話，內閣好快會因應最新嘅醫療研究，要求大家戴罩矣。
早幾日波叔身體好返好多，就同美帝總統侵侵傾電話，之後又同女王吹水匯報。英美傾乜嘢？詳情唔知，但係美帝嗰邊好似話，雙方會傾美英雙邊貿易協議，會唔會響同北方大國嘅貿易問題呢？因為依家外界講緊，要點樣「脫中」，波叔一直都在猶豫當中。波叔病好之後，會唔會大徹大悟，茅同塞都開晒呢？
美帝嘅疫情，一直都唔好。堂堂大國，保護物資都唔夠，又要搵強大嘅北方大國攞貨，另一邊又要鬧強大國家散播病毒，咁真係又要威又要戴頭盔，唔怪得好多人好嬲啦。侵侵真係勁，佢嘅火力，最大嘅唔係射去強大嘅國家，而係美民主黨。
美民主黨有幾個主要戰場。一個係批評侵侵嘅經濟救亡套餐，救市唔救人，救市益有錢人，中小企唔夠分，人民一毫子都冇，所以佢地響國會嗰度大力加碼加錢。另一招就係批評侵侵，面對州政府冇醫療物資，乜方法都冇，原因係侵侵上任之後，裁撤咗奧巴馬年代白宮裡面負責處理疫症嘅辦公室，搞到救援物資冇人理。最近就出埋絕招，就係話侵侵響一月份曾經大讚強大國家領袖處理疫情具透明度，點解依家面對疫情唔敢鬧強大國家呢？
侵侵唔係傻人，一到選舉就醒神。侵侵支持者，狂鬧拜登一直以來都支持強大國家，依家忽然變臉鬧人，係未真心㗎？仲有，就係侵侵支持者提過，聯邦物資唔夠，係因為奧巴馬任由醫療物資公司，走晒去其他國家設廠，而且響豬流感之後，奧巴馬根本冇補充過聯邦政府嘅物資庫存，搞到依家搵多件袍都冇。至於同某大國抗衡？侵侵梗係自認最叻啦。咁搞落去，真係冇眼睇矣。
倫敦大學亞非研究學院法律系博士