點樣睇英美雙帝政府點樣防疫？佢地用咗一啲關鍵詞，例如戰時狀態(wartime)，國家危機(national emergency)等詞語。響佢地角度講，抗疫時期係一個需要萬眾一心，需要團結一致，需要一齊槍口對外，需要相忍為國嘅時候。睇晒呢啲報道，我仲以為我睇緊二次大戰嗰啲政治宣傳口號。
響語言緊要過文字嘅年代，邊個日日月月講嗰套語言，邊個就會贏。抗疫年代，網速5G年代，英美政客網紅日日講武肺(編按：即新冠肺炎)之亂，講到民族主義情緒返晒嚟。咁搞法下一步會點呢？唔知道了。
閒話講完。侵侵依家每日都響度講疫情，好多人都鬧佢抗疫不力，但係佢嘅支持度卻一路領先。係㗎，依家係響戰時，人民自然會好期待一個強勢嘅領袖。侵侵素來擺起個款真係好強勢，自然大家覺得有信心。侵侵嘅支持者，依家講緊，美帝疫情嚴峻，支持者認為，主要原因係一班民主黨響疫情未發之時，顧住玩彈劾侵侵議案，搞到政府冇時間處理疫情。依家搞成咁，就係民主黨強行拉侵侵下馬的必然後果。
講到呢度，大家聽完就真係搞笑。早在疫情初起，侵侵仲響度話佢已經掌控晒整個情況，美帝唔會有事。點知日日出數據，日日感染人數上升，依家變成國家級危機。老實，當北京一月初已經通報美帝，侵侵大大話話有好多時間做準備，依家搞到成個北美世界大亂，唔通真係唔關佢事？不過，大家都要知道，美帝係聯邦政府，好多時抗疫呀，醫護物資呀等等，真係好關州政府嘅事。如果自己州份都搞唔掂，個個攤大手板搵侵侵救亡，真係一日九十六小時都頂唔住。應該咁講，係成個美帝，由上而下都對疫情掉以輕心所致。
抗疫懶懶閒，大家心都散，就算抗疫到封晒全國，往往就係因為起初由上至下，由領袖到市民唔係好上心，依家封關就叫晒救命。英帝首相波叔一樣叫苦連天，因為佢唔單止自己中招，而且醫療人員的確疲於奔命。英帝嘅問題係，佢地政府起初猶豫不決，到咗爆晒大煲先至醒覺。首相病緊之時，負責醫療事務嘅官員講，佢地估計響九月份應該可以穩定番個情況，即是叫大家國民相忍到九月。數下手指，半年的光景。
係咪半年就一定得，冇人知。但英美雙帝嘅玩法，係用南韓嘅方式，盡快響各處做最多嘅測試，睇下全國有幾多人中招。然後響數據方面掌握多啲，即時叫更多人，特別係隱性病人，無病嗰啲唔好四圍走。所以，專家都話，如果快速測試嘅藥生產多啲，就更容易打擊疫情。
英美雙帝嘅評論，依家仲係有啲留手。因為抗疫為先，大家都唔想批評領袖，亦冇時間對付外力。依家疫症叫醒了英美盟軍。疫症穩定後，佢地聯手做嘢報復，至見真章。