疫情依舊嚴重，已影響大家生活好一段時間，可惜係遊戲界都唔係咁好景，注目新作唔多，搞到PS5同XBX買同唔買都分別不大，推出未夠兩個月已失去話題性。至於手機game呢，上周提過嘅《三國志戰略版》意外跑出，土下座身邊「重課」此作嘅人冇一百都有幾十，狂熱度非常誇張。此外本周亦有人氣IP《龍之谷：新世界》，其實《龍之谷》都唔係首次變手遊，今次又係號稱最原汁原味。如果你「機齡」有返咁上下，應該對佢唔會陌生。當年MMORPG橫行，《龍之谷》係罕有以格鬥game咁強嘅動作做賣點，要知道MMORPG嘅意思就係畫面與server同時有幾百甚至千人，要做到流暢唔lag嘅動作類，唔止有新鮮感亦有難度，結果《龍之谷》亦不意外地跑出。今次《龍之谷：新世界》就係延續當年嘅新版本，玩法基本都係MMORPG，除咗職業再冇性別限制外，亦加入新職業「闇影龍使」。試玩半日後客觀講句，隻game講白啲就係純粹賣大家嘅回憶，今時今日sell動作或畫面嘅MMORPG手遊已經多不勝數，而《龍之谷：新世界》無論玩法、畫面、動作以今日標準嚟講都係水準以下，如果你仍然好喜歡每個任務都係殺N隻老虎、Y隻獸人，或者仲係用緊5年前嘅電話，效能唔夠run新game，咁呢隻滿滿懷舊feel嘅《龍之谷：新世界》就好適合你喇。
