上月尾一隻《BIOHAZARD 7》成王，個個唔玩都睇靚女主播張曦雯做live打機，氣勢一直延續至今個月先後有《仁王》同《For Honor》，對gamer嚟講都真係非常忙碌，唔食飯都未必玩得晒咁多game。嚟到今個月尾，其實仲有3隻遊戲唔可以錯過，分別係《超級機械人大戰V》、《NieR:Automata》同《Horizon Zero Dawn》，計品牌同人氣講，《機戰V》應該都係大家最注目作品。首先呢隻係系列首次正式中文化，仲要係用港譯唔係台譯，高達唔使叫鋼彈，登場作品方面亦極為吸引，港人最愛EVA、高達、萬能俠都齊，連首次登場嘅《宇宙戰艦大和號》同《勇者特急》都食到童年回憶，土下座都幾相信隻game必定爆硬！