麥兜所言「……椰林樹影、水清沙幼、藍天白雲，是位於印度洋上的世外桃源……」
一講起馬爾代夫，就會諗起快將沉沒。時日飛逝，但唔見有嚴重下降。反而因流傳將會消失，而多咗建設多咗人，叫小島貌似不斷光芒。
馬爾代夫英文為Maldives，名字可能源於印度語言中的花環(maala)及島嶼(dweepu)之意思，其鄰近Sri Lanka，所以出入境時會容易買到斯里蘭卡茶葉。這島國由26組天然礁石群組成，約有1,192座珊瑚礁島，被稱為人間天堂。連麥兜都話「……椰林樹影、水清沙幼、藍天白雲，是位於印度洋上的世外桃源……」
唔食就瞓 唔瞓就玩
無分四季，只有旱季同雨季嘅馬爾代夫，每逢11月至4月為旺季，一般氣溫大約攝氏30度左右，唔使冷氣乘著海風非常舒服。加上每個小島只有一間酒店，隨意自由活動，不論海灘或者泳池游水、沙灘排球、浮潛、划艇、甚至求婚等等，都可以根據自己喜好時間而決定。全時間的自助餐，任你彈出彈入，攰就瞓、餓就食，隨意即興。再唔係出海觀賞鯨鯊、海豚、海龜；潛水、跳降傘玩埋水上電單車，唔使跟團又唔使導遊，全大自然的寫意生活，仲可以整個SPA同瑜伽。
做得一島一店，當然背後有大財團。旅遊島嶼由私人發展為度假設施，如要過島即是要換酒店。其實馬爾代夫得一個機場，設於首都Malé(馬累)，面積得五分二個南丫島咁大，絕大部分商業機構同埋政府部門都設喺呢度。落機之後要坐船去小島，剩惠最少100美元；再唔係可以用四倍價錢選擇水上飛機。首都人口密度超高，如同旺角至深水埗一帶比較，仲要差得遠，與周邊所布滿的珊瑚環礁正好相反。
唔信唔得 唔順就打
冇Rehendi五星級小屋、亦冇Bikini女郎，有嘅都係被逼要包實晒的伊斯蘭裝束。冇電梯的數層高小樓、密麻麻的狹窄街道、非自助式的平價地道小食，就是貧富懸殊下的馬爾代夫。自從1887年被殖民緣故而被英國保護，至1965年獨立並於1968年成為共和國總統制度。相傳第一批定居者係嚟自鄰近印度大陸南岸嘅船民，不過同其他太平洋的小島如關島和塞班島命運一樣，原住民喺本土發展都係冇乜好，都係被西方的有錢人控制了地方。亦正因為伊斯蘭信仰原因，有傳當地婦女三分一曾受暴力對待。
唔妥就鎖，唔改就沉
馬爾代夫近年政局不穩，恢復死刑判決、異見人士被捕之餘，前總統亦被迫流亡海外，國家2月時曾經宣布全國進入緊急狀態。無助之下人民被迫智慧地對外詳列與政府有密切關係的酒店財團，列出顏色警示供旅客參考。紅色代表違背人權，綠色則相反，從而迫使政府正視。
呢個世界上最低的國家，平均陸地海拔高度只得1.5米，仲要當中有80%不到1米。但係快將陸沉嘅原因，並唔只因為全球暖化，令到海平面上升而海岸侵蝕，而係正在下滑的人權保障，天堂背後，民不聊生。