鍾意聽陰謀論的朋友，呢兩個月真係高潮迭起。凡係鍾意「吹水」講公共政策之朋友，真係要注視一件事：就係響三年後，某人，即係好鬼打得嗰位，就要面對係未連任的思考。經過二十年，大抵大家都了解，閣下想做香江最高領導（唔係西環，呢個首長係由北方委派），係需要北大人欽點嘅。
我地回撥返去兩年前，當時某人仲好巴閉，日日咁樣去四圍點火，查實就好似消防員救山火一樣，響自己面前點火，就可制止外面火頭燒過嚟。但當然，點火點得太多，上面覺得都係唔適合當前形勢，於是就將佢拉下馬，冇得連任。
呢個結果，可能你好happy，但係，唔好忘記，佢仲有幾乎近25％的支持度，咁呢班撐佢嘅粉絲，梗係覺得唔抵啦。佢地有何方法可以東山再起呢？有啲人會話，喂阿哥，佢已經貴為國家級領導，點會降grade三年後再選過呢？我就話，阿哥，你地啲政治頭腦好有問題。國家級領導當然唔會降grade去選啦，而係由佢做精神領袖之派系，會想方設法地東山再起。咁邊個做領袖，到時再算啦，係未？只要北方一強點名，嗰個人就會贏啦，係未？
要敗部復活，首先就係要有方法，無論係草船借箭、陽奉陰違、假戲真做，總之就要有目標，有方法，有手法，就係要夾到依家嗰領導班子，民望碌落去，只要依家嗰班人民望碌低過30%，咁就有方法取而代之了。
另一邊廂，你又唔好以為，上次輸咗嗰班商家佬就真係坐以待斃。呢鋪土地事件，有錢佬唔係咁高興，但係又無辦法。因為北方一強講到明，一定要搞掂土地樓價。呢個仲勁過聖旨，冇人敢say no。但係，咁樣點都係同有錢佬過唔去，唔係好對路。經過咗一年幾，重整旗鼓之後，呢班友又開始吹響集結號矣。唔好忘記，佢地背後都係藍色㗎，不過又淺淺地咁啦。
佢地手法好柔性㗎。例如，上面阿公叫你去攀越A高峰。嘩！係人都知A高峰好難攀上去，因為沿途有好多山賊，真係要先搞好氣氛，先至真係搞得掂。點知響呢個時候呢班人話，與其夾硬攀過A山峰，不如咁啦，你去攀上另一個B高峰，跟手駁條橋去A高峰，咁樣將兩樣嘢捆綁埋一齊，咁咪可以搞好個氣氛，仲一次過攀過兩個高峰，唔係好棧咩？
呢個講法聽落去好有道理。但諗深一層，上面阿公明明只係叫你攀上A高峰，忽然有班人叫你先去攀B高峰，再返去搞A高峰，咁樣明明係做一件困難嘅事，忽然間變咗要做兩件困難嘅事，而且B高峰隨時有更多毒獸虎視眈眈。你會問，究竟呢班友係幫你定係害你呢？
呢啲陰謀論係未好好聽？權貴圍住爭支棍，真係唔知為乜。我就一於買包花生慢慢嘆。關我鬼事？