剛剛完咗嘅年度Apple發布會WWDC，公布咗唔少新產品及新系統等改變，詳情土下座就唔講啦，但因為其他嘢太吸引，令到當中有個重點好容易被人忽視，就係Apple終於宣布tvOS會支援PS4同Xbox手掣！咁可以支援手掣又點呢？如果簡單講，只要開發肯做多個tvOS版本嘅App，就可以令大家而家響iPhone玩緊嘅game如《FF》或《DQ》等逆移植去手機嘅經典遊戲，立即用手掣操作，變成有「家用機平台」嘅體驗。可能你會話，其實Apple TV可以用藍牙手掣唔係咩新聞，一早有啦！不過，直接由PS同Xbox兩大遊戲廠協力，同第三方嘅配件支援，個人睇落就相當唔同！就好似當年真無線耳機都唔係咩新嘢，但由Apple「跟風」推出後先推動到市場一樣。長遠講，game廠開發專為tvOS同手掣而設嘅game已經係可以見到嘅事，大家幻想下，好似宣布今年推出嘅任天堂iOS遊戲《Mario Kart Tour》，如果突然做多個tvOS版，加入番手掣操作，咁到時用PS4手掣響Apple TV玩任天堂遊戲，呢個咁不可思議又離晒譜嘅事情就會好快變成現實了！