依家睇工作報告，同以前大大未執政前好唔同。大大未執政前，工作報告點都係代表緊，總理嘅睇法之餘，仲係集體領導之想法。但依家唔同晒矣。大大只有一個，佢有佢睇法，天威又難測。工作報告又有幾多係代表克仔之睇法呢？咁就好難講。
咁既然係一份，由克仔代表大大宣讀之報告，咁就有需要思考，究竟大大響之前，響港澳政策講過啲咩嘢，咁又響依家份工作報告，又講過啲乜嘢，有冇加加減減咁樣，從中，大抵可以思考得到上面響度思考緊乜嘢政策。
跟手，我地就要想下，能破又能立呢樣嘢。幾千年來(冇幾千啦，千幾年啦)上面領導層好重視一樣嘢，就係蓋棺定論。即係領導走咗之後，無論係落台定過身，究竟佢會留低啲乜嘢豐功偉績。正所謂有破有立。過往幾年，上面要殺獨排獨。五年已過，無理由仲日日講年年講呢啲凶神惡煞之事。一個大有為之領導，最緊要都係立，即係要立啲乜嘢，等人地將來都記得，呢個領導為咗呢個地方做過啲嘢。嗰啲係佢嘅legacy，人人都記得，仲要豎起大拇指咁樣。
克仔講咗呢句：「全力支持香港、澳門特別行政區政府，和行政長官依法施政，大力發展經濟、持續改善民生，有序推進民主、促進社會和諧。」咁呢句其實同之前的說法有冇分別？思路都好似。因為第一，都係支持港澳number one依法施政，而且焦點係先響經濟上做工夫，然後再不斷咁改善民生。
要注意嘅係，響經濟及民生之後，第三步呢就係有序推進民主。咁之前大大嘅說法呢？我地可以比較一下，舊年十九大時，大大係咁樣講：「要支持特別行政區政府和行政長官依法施政、積極作為，團結帶領香港、澳門各界人士齊心協力謀發展、促和諧，保障和改善民生，有序推進民主，維護社會穩定，履行維護國家主權、安全、發展利益的憲制責任。」
對比起上來，克仔今次唔使再講團結，即係響上面角度，大抵好打得都做得OK，跟住呢，克仔就希望好打得下一步做好經濟啦，搞好民生，然後就係有序推進民主。於是，呢一句就係可圈可點，乜嘢係有序地推行民主呢？咁呢方面好打得似乎係需要交貨嘅，但好明顯就唔見好打得北上開會前同埋開會之後，有任何回應噃。
大家千祈唔好，以為「有序推進民主」係搞乜嘢普選。但會唔會響選舉方面修修補補呢？會唔會響選舉制度方面，加入多少少民主成份呢？又會唔會響議席上，畀多啲議席等青年可以上位呢？青年對社會咁憤怒，政府都有些少嘢做吓，例如多些議席，等青年將精力放響選舉呢？
唔知呀。不過，以依家政府咁嘅民望，要搞有序推進民主，難矣！