神奇小子拳賽至今仍是令人津津樂道，星如勝在底氣強及鬥志勁，那邊廂河野則夠兇悍及攻力強，星如可謂贏得驚喜，河野則輸得意外，再撇除主場因素及技術爭議，其實最佳賽果應是雙贏或平手，若然星如更能主動提出擇日重賽，無論往後賽果是勝是負是和，都可更得民心，總之能夠以德服眾，便是大師傅了！
然而，打拳跟炒股則是兩碼子的事，前者可以打到對家服為止，敗者亦可尋求喺邊度跌低，就喺邊度企番起身之自尊，但炒股則相反，喺邊度跌低，就不單千祈唔好望喺邊度企番起身，仲要第一時間遠離現場及冇鞋挽屐走，最忌係唔認輸及磨爛蓆，身邊就有不少好友都染上這壞習慣而由大贏變大輸，簡直一敗塗地，炒股大忌！
在股場中意外取勝，絕對是值得慶幸的美事，所謂意外，包括了升幅之大及速度之快的意外，證明幸運之神幫了閣下一大把，贏了便要感恩，也忌返轉頭；相對而言，輸得意外則需從中汲取教訓，也需學習如何善後，這對往後部署、甚至整體炒股生涯必帶來無窮影響。
之前常掛口邊的案例，便是在科網大時代中以小超之名大手購入8號仔的悲慘故事，不少人都瞓身撲入，一心認為冇得輸，但出了事後又十居其九不願嚴守紀律，不肯在一個繼一個出現的止蝕位上逃亡，結果坐到今日仍是長相廝守，一方面將九成幾老本斷送，另一方面更錯失了往後十幾年的入市機會成本，更遑論幻想將其換入騰訊(700)就發達了……
其實，人人都有買錯股的機會，惟股場勝負的最大分野，則是如何定奪一套好的進退策略，贏谷輸縮的錦囊可多作領悟，高峰期時贏錢人人皆可，亦無甚難度可言，但在形勢最佳時盡谷則沒多少人有這吉士；同樣地，在高位抽身而退後仍可忍受到分毫不再入市的盡縮能耐，場中亦沒幾人。幾位朋友在科網潮便贏過大錢，但就是因為在步入熊市階段時，不願抽身而退，一直續坐蝕本貨，繼而磨爛蓆，沿途更不斷溝貨欲拉低成本，結果嘛？不僅未能保到成果，還將老本連後進資金亦都賠掉，至今仍是沉淪不起！
打拳若勝得不夠徹底或輸了之後，大可擇日重賽，尋求所謂喺邊度跌低、就喺邊度企番起身嘅挽回自尊良好感覺，但股場則可免則免，哪一隻令你重創的股票，最重要是要知究竟錯在甚麼地方，賽後檢討最為可貴，但絕不可作為復仇依據，那隻股份令你重重創傷，最好從此敬而遠之，被一股KO，實在是多麼的不值！