希臘大選，點講呢？上任前係左翼但上台後變咗極右到選前忽然又變番左翼(即係先左後右又翻兜變左)的執政黨齊普拉斯(圖)選輸，由中間偏右米佐塔基斯贏咗。不過，《衛報》評論話，齊普拉斯以左翼口號上台，但上台後太容易與體制妥協，聽晒歐盟話，結果經濟政策走向極右，勒緊大褲頭，大公司固然無事，小市民捱苦。希臘變番中間偏右，似乎部分福利政策，可以鬆綁了。
問題係，咁係未代表，極右冇市場呢？咁又未必。一個國家未試過極右之苦，真係好難願意接受中間偏右或中間偏左的政黨上番來執政。問題係，有國家未試過極右，咁點都想大膽啲試下。好似英帝保守黨之黨魁選舉一樣。波叔早兩日同亨叔的電視辯論，一開波，波叔即刻叫英國人，拿番自己的mojo出來，齊齊打拚未來，做好脫歐之準備，之後句句都窒住亨叔。每當波叔叫晒啲口號式語言，台下觀眾就拍晒手掌。
波叔點解支持硬脫歐？佢話如果大家冇硬脫歐之心理準備，即係冇背水一戰去迎難而上，即使硬走都要走，咁係冇辦法迫到歐盟改變脫歐協議。即係話，如果冇打end game之決心，冇得贏盡。我呢啲左膠，聽到都打個突。咁樣即係叫人，嗱，呢度有手套，保鮮紙同頭盔，大家去前線衝啦。咁亨叔都窒佢，有關北愛同愛爾蘭的邊境管制，脫歐後的中小企補助呀，佢都有晒計劃。但我見到電視機裡面之現場觀眾，似乎都係支持波叔嘅佔多。睇落好替亨叔可惜，因為亨叔之表現，就好似依家出入中環嗰啲外籍高層一樣，文質彬彬講理由及道理。假如佢早出道十年，隨時會贏黨魁選舉做埋首相。但生不逢時，因為家陣英國選民只要空口講白話，吹牛以至風花雪月之議員，而唔係去搵理性領袖。連英國選舉都搞到群魔亂舞，仲要大口亂講之波叔領先緊個選舉，大家如果有仔女子孫響英國讀書，隨時要睇住英鎊匯價，有得再跌㗎？
點都好，英帝如果有個狂野型(打咀炮)之政客做首相，咁佢同美帝一定合拍無間，呢個亦係部分保守黨議員之心聲。雙狂野若成為美英大國的話事人，同樣都係劍指偉大的北大人之崛起，真係殺傷力大。北大人頭痕之處，係美英雙帝合謀搞你香港，制衡北方大國。
但係，美帝侵侵，上任以來，干預其他國家內政，成果麻麻。年初仲係搞緊大龍鳳之委內瑞立，有兩個總統，瓜伊多同馬杜羅，咁一個國家有兩個太陽，唔係好實際。問題係，眼前政治僵局，邊個有能力化解呢？有委國人寄望，美帝派陸海軍精英，一於打過去，出兵打委國。唉！聽聞侵侵say no。政治往往都係面對現實：出兵的話，搞唔好隨時輸埋，連任要緊，費時搞也。