美帝列根號航母群停靠香江，有張相片真係令人細味。相片中，美帝國旗置左，區旗置右，一副美帝作主，區旗為副，真係以為特區成為了美帝的屬地。我估我咁樣思考相片，真係殖民地餘毒未清，尚未解毒也。
彭斯訪巴布亞新畿內亞出席APEC，途經日本等國，在機上言辭強硬，在巴布亞新畿內亞同台灣代表張忠謀見面。要留意，彭斯提到佢地仍然支持One China Policy，即係美方之一中政策，但係，有傳媒話，當中彭斯冇提過三個中美公報，會唔會有情況呢？翻查之前侵侵都冇講過，佢口中的「一中政策」之內涵，同埋佢之「一中政策」同之幾個美帝政府之一中政策有何不同。真係頭痕。
轉頭睇下台灣九合一選舉高雄有藍營韓國瑜之韓流，北邊新北市就有綠營大老蘇貞昌硬撼藍營侯友宜。台灣地方選舉，通常會響南面，同埋北面，各搞大一個戰場，利用南北兩邊之戰場來拉抬周邊選情。台灣選舉文化素來精采，大戰固然好睇，但仲係可以睇下佢地中生代之戰鬥力如何，特別係桃園市長之鄭文燦會唔會大勝，同埋陷入苦戰之台中市長林佳龍，佢地值得關注。咁究竟柯P有冇機會連任？原本柯P走勢好好，但我就真係驚有「奧步」，令佢輸埋。呢頭列根號出手停靠香港，另一邊廂，美帝響關島又飛兩架轟炸機去南海自由航行，好明顯美帝正係要保障台灣選舉安全。台灣選舉點票速度好快，黃昏都大抵知道賽果。局中人估綠營會輸一半縣市長，睇下點？
英國首相May姐整咗份英帝退出歐盟之文件，搞到個個媽媽聲，有黨內國會議員借勢逼宮，點知唔夠黨內其他國會議員支持，睇來搞唔掂，May姐又係驚濤駭浪之下，捱過一劫。另一邊工黨仲有人想搞二次公投，等英帝唔使退出歐盟。工黨老頂賓叔其實唔笨。二次公投，邊度會有勝算呢？與其搏一鋪，不如等May姐表演下武功先，等May姐如果冇法擺平黨內之反對派，到時一於出手迫提前大選仲有著數。不過今時唔同往日，當日保守黨內支持退出歐盟嘅智將，依家變成過街老鼠，響黨內不得民心。May姐都知，如果提前大選，保守黨一定輸晒，既然係咁，佢都會說服黨內國會議員，不如大家算啦，齊齊推動退出歐盟，唔好依家搞亂個局，提前大選大家無好處。
轉眼十一月底，侵侵習主席響阿根廷會面。之前又係侵侵之惡招，一邊強硬，一邊又係願意去同北京去傾。響風高浪急下，香江出奇平靜。咁梗係啦，依家上頭要營造一個相對平和之狀態，可以等北方大國同美帝可以響不受干擾下，坐低傾偈。係啦，邊個呢個時候響度搞局，令香江出現狀況，甚至令到談判出現波折，冇人擔當得起，係未？