我喺最近一次嘅失眠夜突然諗起自己六、七年前做空姐時，喺外站一間罨耷食店食過嘅一碗「海鮮砂鍋粉」。湯底嘅鮮味同紅薯粉嘅彈牙口感，令我回味至今，久久不能忘懷。
人嘅記憶好奇怪，有時愈刻意去忘記一件事卻記得愈深。當你愈落力想記得一件事嘅時候，反而愈記唔起，令人非常難受。我輾轉反側咗成晚都諗唔起自己到底喺邊個航點嘗過呢份人間美味，只記得係中國嘅一個城市。反而碗砂鍋粉裡面有咩配料、湯底嘅味道、小食店內嘅簡陋裝潢，甚至老闆同佢年邁母親嘅模樣，我卻記憶猶新。當年我總會喺小食店內先幫襯一碗，再外賣一碗返酒店食，所以我連酒店嘅格局都記得非常清楚。成晚流流長，自己又剛巧失眠，所以我決定循酒店呢個方向去查過究竟。
我首先翻查舊公司喺六、七年前喺中國有咩航點，再到某幾間大型連鎖酒店嘅網頁續個航點去查，嘗試認出係邊個中國城市嘅酒店房間。花咗大概兩小時，我終於搵到記憶中嘅酒店房。然後我又花咗一小時，查看酒店附近嘅環境同有咩食店。皇天不負有心人，最後我趕得切喺日出之前終於搵到呢間小食店嘅店名同舊址。相中嘅店面同我記憶中嘅一模一樣，不過好可惜呢間小食店早喺幾年前已經結業。
第朝起身之後，我決定要參照記憶中嘅味道去煮一碗砂鍋粉。可惜辛苦點整完出嚟一啲都唔似，仲好難食𠻹。或者我永遠都再冇機會嘗到呢份美味，永遠都煮唔出類似嘅味道。就由呢份珍味同當年飛行嘅快樂時光，一併留喺我記憶裡面吧！
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
：為何斯德哥爾摩沒有譚仔三哥 by 三家姐 ：sis3ter