明明前半年都仲繼續鬧緊特首候選人曾俊華做財政司司長嗰陣年年計錯數，又話佢係守財奴，仲批評佢講嗰句「You always agree with your boss. No questions about that.」係打工仔心態，唔配為香港人服務。半年後嘅今日，唔知點解突然有咁多人表態話好想曾俊華做特首，就連爭取雙普選嘅泛民支持者都開口為曾俊華解畫護航，仲要身體力行以錢代票比俾支持曾俊華做下屆特區首長。
記得之前曾俊華仲未對參選有任何表示嘅時候，佢話如果佢參選會有機會眾籌選舉經費，當時身邊朋友A都已經話如果佢要參選，以佢嘅人脈求其搵兩三個友好，籌一千幾百萬蚊絕對唔成問題，眾籌根本就係多此一舉，唯一嘅目的係營造民意，讓沒有票喺手嘅七百三十萬香港人恍似置身特首選戰裡面，以為自己有份左右大局，向民眾向中國共產黨製造有民意授權嘅假象。
但那些其實視曾俊華如己出的香港人又有無諗到，當大家以為中共已篤定林鄭做特首所以硬撐曾俊華的時候，其實中共叫林鄭出選嘅目的係純粹陪跑，因為林鄭老早已被香港人認定係梁振英2.0，佢當選只會令香港人更加反共，對中共無好處。反而曾俊華才是真命天子，中共就係利用他的偽親和力及民意，軟性荼毒大家以為曾俊華當選就是中共聽民意嘅結果，從而拉近番中共跟香港人嘅關係。
再者，如果呢個方法真係成功，那以後的特首選舉，中共只要透過輿論派出幾位中共都能夠接受嘅候選人出閘，再鼓勵香港人以鈔票代替選票，至於候選人係咪來自同一間馬房都唔重要，最緊要係自己有得玩。而手上鈔票越多就代表越多選票喺手，投注額越大，投入感就自然更高，像賭博落注一樣。而只要香港人對特首選舉的投入感越高，那就越沒有需要再重啟政改，以後就這樣讓你參與特首選舉就夠了，這所謂的「選票」是否具有法律效力都不再重要，反正大家都已經很投入地參與其中。 天生與皮膚癌同生共死，生前已寫好遺書，辦好葬禮，深信擁抱死亡才能活在當下。