上次講到遇到個日本人，攞住個公事包鬼鬼祟祟。我跟佢去到一個商廈既後樓梯。我直接打開防煙門，見到「江口生」正耷低頭，用左手拇指同食指握住一個煙斗，個煙斗鉢前面崩咗一個角。我微笑咁向佢點頭，然後喺後袋，攞返包煙出嚟吞雲吐霧，而佢亦若無其事咁繼續食佢個唔熄既煙斗。我主動打開話題：「你係咪喺呢度附近返工？」他吐出一口煙，然後用日語笑笑口講，「笨蛋，我都死佐了，仲返咩工？」雖然我日文半桶水，但係一聽佢講乜，馬上就自動翻譯為廣東話，所以無論咩內容我都完全明白。我笑笑口咁，繼續自己個口煙。佢亦再冇出聲。過咗一陣，佢將佢嗰啲煙灰「鄧」咗落地下，然後又攬住公事包喺心口，轉身撳lift離開。
我繼續跟。落到去地下，轉咗個街口，去到個商場門口，人來人往，「江口」喺人群之中穿插，停馬路交通燈嘅時候，不時攞個手機出嚟睇，好似等緊啲好重要既信息。就係呢個時候，我發覺佢嘅外型開始變化，由原來50歲既外表，慢慢變得後生仔，變個陣身體愈來愈模糊，好似半透明咁。大約僅僅用佐3分鐘，佢變返30歲既樣，而且長髮變短髮，成個人仲精神晒，連行路上嚟條腰都挺直佐，腳步都快咗。
後生版嘅佢，落咗JR山手線鐵路站。過個閘機嘅時候，係個口袋攞咗一張鐵路飛出嚟，放咗落去閘機。(自備票，無走數) 我睇落去，部機當然冇反應，但佢成個人就直接穿過，若無其事惦行惦過。入到列車，佢坐咗喺一個學生隔離。個日本學生妹正喺度睇緊本漫畫雜誌，佢伸個頭過去，同佢一齊睇，由上車到落車，聚精會神，唔俾任何嘢分心。到達原宿駅，佢好唔情願咁起身離開。轉身嗰刻，係月台剛好撞到一個着得好性感嘅女仔，佢成個人十字型咁訓咗落地下，公事包裏面啲嘢跌晒出嚟，喺嗰一刻我先睇到裏面原來裝滿晒錢，一沓沓的日圓，淨係跌出嚟嗰度，起碼都幾十萬。我心諗，天啊，佢竟然身懷巨款，嗰啲錢仲係真正嘅日圓咁樣，完全唔係陰司紙，無論係玉帝或冥皇個頭都唔喺上面，正版福澤諭吉印刷頭像清晰。鬼竟然仲用真紗」我心諗真係講都冇人信，但偏偏就比我見到，仲要喺日本咁得意。
出咗車站之後，「江口」上咗一架的士，講得清楚啲，佢係突然間跳咗上一架有人坐緊嘅的士上面，我唔知佢知唔知道呢架車去邊，但我當時諗都冇諗，只好同時跳上另一架的士，跟住佢去。只係行咗10幾分鐘，就喺前面一個十字路口停燈位，佢隨即自己開門喺架車度行出嚟，我立叫即停車繼續跟。去到一個公園嘅門口，行咗入去兜咗大半個圈，喺另一個出口又出返嚟，前後嘥咗我半個鐘頭，似玩緊「反跟蹤」。我望望個天，由日頭玩到夜晚，周圍嘅霓虹燈著晒，而悲劇既係，我仲未食飯，個肚估估聲。我開始有啲動搖，係咪應該繼續跟落去，心裏疑惑係咪比佢玩緊。
(聲演:張文獻)