行運未必行到腳趾尾，但勢勁難擋有時難避其鋒。紅軍穩定放甩，「狐狸」李斯特城呢排戰無不克，變咗最強挑戰者；但要留意，兩軍剛戰作客大捷，對手最重要嘅中路守將都咁啱一早傷出，好波又好運。還記得李城2016年封王一季，戰至2月中「臨尾香」敗走阿仙奴時，外界當時紛紛指兵工廠爭霸厚望，結果反而係李城施展強橫後勁，終贏對手10分締造封王奇蹟。如今狐狸尾巴早露，同期所有數據對比當年封王更勁；加上射手占美華迪老多3年，入球能力竟然更強，更似奇蹟，球隊又唔使踢歐洲賽，封王神話又成熱話。
狐狸前有紅軍，後追包括列強曼聯及熱刺漸回起，車路士下月可解禁添兵，曼城亦會找中路守將，大家都希望半季後再振作。反而殺著唔多、打速度波為主嘅李城漸露底，要考主帥羅渣士功力；月尾要連鬥曼城同利物浦，其中拆禮物日迎戰紅軍，係後者遠征卡塔爾踢世冠盃後首戰。時勢造狐狸，但能否笑到最後，呢場早來榜首戰非常期待。