德國沉底定反彈

半年前，德國為拯救沉淪嘅國家足球隊，史無前例炒咗主帥費歷克，由36歲嘅拿高士文接手，結果呢位少帥半年點兵教過4場僅1勝，去年年尾兩仗連負土耳其和奧地利；當時前鋒夏維斯未翻生，喺嗰兩場敗仗畀少帥安排踢左翼衛，國家隊嘅入球希望係正箭頭、31歲多蒙特前鋒富克洛。少帥今次國際賽挑選好多新人，包括喺德甲入波多過富克洛嘅史特加安達夫同賀芬咸嘅麥斯比亞，嚟緊鬥完法國再戰荷蘭，希望貴為今夏歐國盃主辦國，德國人唔好似踢對上兩屆世盃咁失禮。

日耳曼兵團世界排名長期喺10名外，自從2014年高路斯退休後，箭頭後繼無人；隊長根度簡同攻中湯馬士梅拿，仍要支撐大局。翼衛大家只係仲記得一代名將拿姆，而主力中堅魯迪格大隻有餘，半年前輸畀日本1比4嗰場友賽，弱點盡見。拿高士文今次會再用喺阿仙奴打9號位重生嘅夏維斯、新希望穆斯亞拿同科利安華迪斯坐鎮中場，配合一批德甲新人再布局，繼續沉底定反彈？呢兩場硬啃嘅太公波會睇得清楚。