英超一向走得快，「狐狸」李斯特城由英超稱王，到班主遽然離世，只不過係短短兩年半嘅事情。已故泰國班主維猜當年重用一把年紀嘅老帥雲尼亞里，以明刀明槍嘅英式足球，配無乜星味嘅陣容，喺2016年初夏，成功將李城打造為英超史上第六支冠軍球隊，被形容為球壇奇蹟。呢位愛養靚馬嘅泰國人，速度至上，話咁快喺球會攞英超冠軍嘅半年後，炒掉雲帥，李城稱王翌季最終沒有降班收場，依家落到法國人佩爾手上，浮沉中游。
兩年半前喺主場贏愛華頓後領獎嘅正選陣容，跟空難前球隊主場完場前追和韋斯咸執番1分比較，得番門將卡斯柏舒米高同中場馬克艾拜頓擔正；連代表人物占美華迪亦漸老退，剛戰先貶後備，只踢半場，李城比一般冠軍隊，陣容散得更快。佩爾棄老兵重小將，芝維爾、占士麥迪臣、尼迪迪同迪馬雷格雷二十出頭，方向正確；英超搞得好可賺大錢，悲傷過後，維猜後人應不會輕易賣盤，預計「狐狸」只會走得更快，今季有望上前10名。