熱刺孖寶活得更好
熱刺仲有4場波，就決定可唔可以保住英超條命。回想盛世，擁有前鋒孖寶哈利卡尼同孫興民，二人合作8季入球及助攻無數，頭三季更幫到呢支北倫敦球會全入英超三甲，但跟冠軍冇緣分。卡尼個人攞咗3屆英超金靴獎，孫仔喺卡尼離隊投後，幫到球會攞咗上屆歐霸破捧盃荒。如今兩人年紀唔輕，仲可以喺所屬球會擔當主角爭緊盃，熱刺如果唔係貪圖拜仁總出價1億英鎊，當年放走未夠30歲嘅卡尼，現時嘅殘局係咪可以避免？
就快34歲嘅孫仔，周中要為FC洛杉磯出戰中冠盃四強，雖然今屆加入美職後暫時聯賽未有入波，但變返以前嘅助攻王，亞洲足球員嚟講真心勁。只係三獅王牌卡尼更強，穩奪3屆德甲神射手外，今屆有「新洛賓同列貝利」嘅拜仁孖寶兩翼源源不絕供應，卡尼戰力依然強大，踢德甲超班當養生波，對上15場歐聯入咗16球。今屆歐聯四強，拜仁係三線戰力最平均、季尾最有能力將比賽玩弄股掌嘅一隊；孫仔上屆捧歐霸，卡尼會唔會圓終極夢想贏到歐聯呢？