水晶宮威埋呢季

英超球會揾領隊嘅眼光同能力，可以同呢個聯賽嘅長期盛世成反比，呢個情況係今季特別離譜。攞歐霸踢歐聯嘅熱刺，季前炒功勳領隊禍延至今；去年決賽輸俾佢哋嘅曼聯竟然仲留低艾摩廉，至今年初換返流紅魔血嘅人，重上正軌，其餘包括車仔炒教波叻過玩政治嘅馬利斯卡、熱刺無厘頭揾冇料杜陀救亡，都係兜兜轉轉浪費時間。好難得見到般茅波士伊拉奧拿同水晶宮嘅加士拿，命運自決，早響話季後離任準備食大茶飯。

識教細球會唔代表一定升到呢，賓福特嘅法蘭克錯投熱刺正係明證。比較上，西班牙人伊拉奧拿識得發掘潛力新星，但加士拿可能喺市場上會搶手啲，事關佢喺德甲歷練多年，轉教英超細會水晶宮，喺佢麾下兩大猛將米高奧利斯同伊比爾治伊斯先後走人，喺大會發光發熱，幫球隊賺逾億英鎊；之前唔標青嘅好似伊斯美拿沙亞同桑馬迪達今季再升一個呢，又幫到水晶宮攞上屆英足盃，今屆大有機會染指歐協聯，攞住呢份CV唔憂冇份好工，只怕水晶宮將軍一去，打回原形。