巴西冧檔之後

巴西輸俾挪威，可以找到數十個理由，但呢個震撼彈唔比12年前以主辦國身份，4強1比7輸俾德國細。原因今次係由歐洲最負盛名嘅安察諾堤領軍，但卻係該隊自1990年以嚟，再次喺世盃16強就收工。決賽周賽前已續約至2030年、年薪1,000萬歐元嘅安帥，今場賽前豪言只有領軍經驗多過佢嘅曼聯費爵爺，先有資格指點佢；如今鬥挪威嘅比賽中部署接連失當，輸波責任大。不過巴西足球由上而下都重視名牌，又睇下老人家嗰把改革國家隊嘅手術刀，會唔會生銹。

巴西12年前慘敗之後，元氣大傷，之後接連兩屆美洲國家盃分別8強止步同分組賽出局；當年慘敗缺少背傷嘅尼馬，今場佢冇態出場幫手孭鑊，加埋卡斯米路、馬昆奴斯等老兵陸續退下，適逢死敵阿根廷嘅球王美斯，打埋今屆世盃都應該退役，南美足球秩序將會重洗牌。森巴追求超級球星再降世，不如寄望由雲尼斯奧斯祖利亞擔起大旗，配合一眾當打新人重新出發，就算再捧世盃無期，只要喺南美球壇手執牛耳，足夠安帥安享晚年。