三點起身睇波

以前四年一度係播世盃嘅賣點、口號，球迷夢寐以求嘅大賽。如今足球係一門大生意，比賽嘅密度同速度，接近球星們嘅極限，足球大賽嘅可觀性同追看度大減，今屆世盃早段都有唔少悶戰。何況話咁快曼城、車路士等大球會就會嚟香港踢表演賽，英超下月又開波，睇球星機會多的是，咁點解仲要咁辛苦捱夜睇？

今屆2場準決賽同決賽都係安排美國炎熱嘅下午、香港球迷最難頂嘅凌晨3點開波，幸好世界排名最高4隊分途對決爭霸，令球迷觀賞意欲進一步推升。英超近年幾乎壟斷歐洲轉會市場同各大錦標，去到世盃亦唔例外，4強中上仗正選44人有20人嚟自英超，明晚英阿戰，就好似踢緊美職嘅球王美斯，首次置身一場英超內訌戰，亦可能佢老人家有今生冇來世嘅大戰。今晚法西戰，法國正選平均分布歐洲5大聯賽，別具一格，陣容嘅新鮮感又最似以往世盃格局；一路走來踢得瀟灑，唔需要划船或者Wonderwall式口號，又冇神級球王帶領，仍博得唔少球迷欣賞，希望佢哋成為決賽主角之一。