世盃學懂的事

世盃曲終人散，一個盛大嘅足球嘉年華會，主辦當局認為空前成功；4年後或會進一步碎片化，火速增至64隊機會大增，再賺個滿堂紅。跟海地同佛得角一樣鮮為人知嘅小國，將空群出現喺世界足球大舞台，並趁世界強隊分組賽hea踢發難，製造放煙花式嘅足球話題。但係咪可以真正持續推動小國足球熱，健康成長發展，只屬後話。無論國際足協點樣大增隊數，為各大洲謀福利，歐洲強國將來仍會喺重要時刻逐一現身，佔壟斷之勢，當再沒有球王美斯嘅南美洲，只怕將來連八強都未必佔到一席。

現今資訊發達比賽又多，歐洲球會球探影響力大，世盃唔再係搜求良將、新星嘅好市場；而且為國爭光、齊心一戰嗰種力量，會令部分球員好似阿根廷咁戰力倍增。但要借世盃提升身價，阿根廷只有祖利安艾華利斯仲做得到，正選中場迪保羅仍會留響美國，跟美斯喺邁亞密踢美職。上屆摩洛哥爆紅，但之後轉大會嘅國腳多變「水貨」，今屆該隊又有法甲中場保亞迪上位，睇下邊位英超大豪客出手。