英超聖誕願望

西法德甲歇冬，球星可避寒陽光與海灘，意甲例常比賽至跨年。英超照舊上演瘋狂賽期，自拆禮物日深夜計起14天內上演4輪，幾乎日日都踢英超；最辛苦係倫敦球會水晶宮，自上周中歐協聯計起，去到下年年頭呢20日內要踢7場，連操波都未必有時間，頭兩場不勝只見防守腳軟尾段冇氣，今晚盃仔硬撼阿仙奴，之後再連踢4場英超。就算隊波擁有神奇主帥運籌帷幄，純粹去到打體力已冇精妙部署可言，今個聖誕願望只求眾主力健康頂硬上，隊波唔好沉落去。

踢得密又濕又寒，主力受傷難免，幾支傳統列強除咗曼城其實冇乜中堅可用，捱唔捱得過呢個快車檔期，對今季成績起關鍵作用，以攻為守去掩蓋守力不足會係一個好方法。一哥阿仙奴俾曼城同維拉逼得好緊，聖誕願望當然係要破咒，聖誕冠軍變成全季冠軍嘅祝福。被炒領隊大熱嘅熱刺法蘭克，緊接兩場倫敦打吡鬥水晶宮同賓福特可能係最後逃生門。願望最卑微會係遠遠包尾嘅狼隊，食完聖誕大餐就要作客連鬥利記紅魔，只求小敗是福。