車仔不怕炒領隊

英超大亂，場外掀炒領隊風，場內踢得密亂局，就算最多精兵嘅「一哥」阿仙奴近5場全勝，但其中4場只係淨勝對手1球。傳統Big Six中熱刺近5戰失10分，車路士同曼聯失咗9分，結果後兩者新一年話咁快已炒領隊，其中5年換第7個領隊嘅車路士，又睇下可唔可以再一次喺季中撥亂反正。

車路士由前朝俄人阿巴到現在美國人做莊，一向炒領隊唔手軟，但歷任波士多數交到功課；以往迪馬堤奧同杜曹季中接手更捧走當屆歐聯，證明隊中傳統識引入優質兵。球隊對上一次捧國內重要盃賽已喺2018年英足盃，但接住先後捧走歐霸、歐聯、歐超、歐協聯同世冠盃。依家由衛星球會法甲斯特拉斯堡內調少帥羅仙尼亞回英接手，新帥教波級數係近年車路士最低檔一位。不過只要睇車仔啱啱殘陣作客都可以逼和曼城，之前主場又識得大炒巴塞同打和阿仙奴，即係呢班為個人前途、踢法傾向個人主義嘅世界各地年輕優質兵，只要得到球會教練(coach)適度鞭策，估計下半季成績會較積弱嘅紅魔樂觀，下半季收獲盃賽冠軍，甚至重返英超三甲也不奇。