打歐霸盃，球隊起碼少休息一天，再返聯賽踢會好蝕底，呢個想法喺英超應該改觀。熱刺歐聯苦戰贏國米後，再鬥死敵阿仙奴，擺明末段輸體力同兵薄。再睇番Big Six今屆踢完歐洲賽後，返灼踢聯賽5戰嘅成績，踢歐聯嘅曼聯同熱刺分別失咗7分同6分；車路士同阿仙奴5戰未輸過只和過2場，顯示後兩者用一、兩隊應付唔同賽事，成功減低踢歐霸盃嘅負面影響。
北倫敦打吡賽前，作客嘅熱刺竟然被外界稍為看好，可謂近年奇聞。主因睇今屆未贏過強隊嘅阿仙奴，依家陣容冇乜星味，只重快、狠、搶；但兵工廠新帥艾馬利勝在排陣大膽，場上調動果斷，球員士氣好全場奔跑，只花幾個月，艾馬利差不多已完全幫阿仙奴「去雲格化」，呢個賣點夠強。打吡開賽後不久，鏡頭捕捉到艾帥坐喺後備席，作胸前畫上十字架狀，似在禱告，結果球隊打出漂亮勝仗。明晚要作客今屆估佢唔到嘅曼聯，對打體力波嘅阿仙奴係重大考驗，睇嚟艾帥需要更大嘅祝福，先能夠連勝Big Six戰。