西甲一向係英超喺市場上嘅大敵，只因三雄巴塞、皇馬同馬體會踢法、風格各有特色，新星唔少，又長期喺歐洲賽有一定成績。兩大聯賽新季同日喺周五開鑼，英超派出利物浦主場出擊，反而西甲主場代表係基羅納同維拉利爾，牌面冇得揮，球迷焦點一定聚晒喺用咗3億歐元買人嘅紅軍身上。
英超Big Six狂玩軍備競賽，皇馬用咗1.7億歐元改善防務就話收手，但進攻重心比寧咸季初養傷影響唔細。連續四屆聯賽唔入頭兩名嘅馬體會，陣容洗牌再嚟，只怕教咗十幾多嘅施蒙尼技窮。表面無敵嘅巴塞，內裡虛空，年年夏天為咗慳到一千幾百萬歐元波糧，整靚盤數搞壞士氣；老牌射手羅拔傷患漸多，借到福仔禍福難料。魯營球場改建工程一拖再拖，暫時頭3輪西甲全部作客，巴塞想靠「新場」吸水要等等。
非西甲三強比賽，近年吸引力無乜。再睇返今屆三支升班馬，暫時各用二、三百萬歐元簽人，唔夠俾利記沙拿一個月波糧；如果皇、巴兩大班霸喺歐聯戰場影響力再減，咁西甲嘅影響力真係有啲危。