巴西上仗世盃外主場「臨尾香」打和、對上兩屆外圍賽都小組包尾嘅委內瑞拉，其實係奇恥大辱；之後傳出「大佬」尼馬，同兩大新星雲尼斯奧斯祖利亞同李察利臣，賽前同幾位網紅名模喺酒店開派對，睇怕仲有尼馬一日，巴西隊冇乜希望。
巴西對上一次攞世盃係2002年，尼馬冒起成為森巴天王後，國家隊連南美洲山寨王都談唔上，聲勢被阿根廷掩蓋。失意去年尾世盃後，巴西隊好應該借無謂2026年南美世盃外(10隊頭6名出線、第7名踢洲際附加賽)，加緊重組，重用新人接棒；可惜森巴等緊皇馬名帥「肥安」接手，替工做住教練，主力陣容尤其由31歲尼馬領銜嘅攻擊組合，唔變少錯，結果hea踢搞到畀委內瑞拉逼和，當若無其事。喺英超唔叻嘅箭頭李察利臣，近年地位好似同尼馬一樣，不可撼動；原來二人係派對死黨，有「大佬」睇場。美斯在阿根廷嘅向心力，在於場上嘅超凡球技；尼馬嘅魅力在場外，加埋喺沙特希拉爾賺緊265萬英鎊周薪，呢種超級富貴同半退休嘅踢波心態，對上位中嘅國家隊新星，不是好事。