乙組仔夏蘭特

鬥阿仙奴錄得0射門0重要傳送嘅藍月射手艾寧夏蘭特，賽後俾曼聯名宿、現為球評家嘅堅尼「抽水」，狠評整體演出似一位乙組仔。夏蘭特老父嘅膝頭哥，當年喺場上食正堅尼鞋底餅，加速傷患要收山，牙齒印延續下一代；如今「小夏」似乎受早前傷患困擾，季尾狀態平平，連最強嘅入球本領，今屆明顯跌watt(上屆英超場均入逾1球，今屆跌至0.625球)，更一再俾兵工廠兩大中堅嘜死；藍月季尾又叫3飛，哥帥想再食大三元要再諗計。

上季季前，哥帥改革進攻模式，放走「耶穌仔」換入小夏，敵衛一時難擋，藍月後上奪三冠王；今屆國內優勢大幅收窄，暫時鬥英超前5位球隊不勝，6戰得4分，上屆同期勁取16分；嚟緊歐聯又要撼皇馬，場場硬仗。既然夏蘭特進攻套路暫被洞悉，個人扭轉戰局嘅能力又未去到麥巴比嘅級數，哥帥要變可用季初表現飛躍嘅祖利安艾華利斯打箭頭外，仲有就係最強三獅菲爾科頓做「偽9」，潛力更高，踢法全面，成就唔會差過小夏，堅尼都唔會敢話佢係乙組仔。