世盃外圍賽雖然競爭性一般，但成績往往係本身聯賽嘅照妖鏡。呢邊廂愛爾蘭神奇踢走匈牙利，連同英倫三島四隊，五支兄弟波估計加埋藉歐國聯排位，可以全部躋身明年3月嘅世盃外歐洲區附加賽，16隊爭4張尾班車車票。愛爾蘭靠嘅係一位早年喺英超撈唔掂，喺荷甲慢慢上位嘅射手特萊柏洛特；除英超之外，幾支兄弟波所屬嘅聯賽都屬低水平，包括一路走低嘅蘇超，附加賽兄弟爬山，惟有各自努力。
一位射手可以救全家，艾寧夏蘭特當屬表表者，但連續三屆要轉戰附加賽嘅意大利，近年冇呢張王牌，從意甲種種不濟只怕空有鬥心嘅國家隊教頭加度素，神仙難變。首先今屆意甲暫時喺五大聯賽平均每場入波最少，只得2.2球，和波佔三成半，悶戰多，觀眾少，打咗11場聯賽有8隊連每場平均1球都入唔到。近期已有5隊炒教練，包括上屆意甲前6其中三隊，強隊冧檔，歐聯暫時得國米似樣，其餘三隊喺大聯賽徘徊中下游。意大利射手凋零，最似有能力嘅列迪古喺沙特掘緊金，但好難一個救全家。堂堂四屆世冠盟主意大利，對上兩屆喺附加賽一球不入慘烈出局，明年三月第三度登場，只怕落入第三次魔咒。